Аляксандар Бухвостаў застаўся без партыі :: Хартыя'97 :: Навiны

На паседжаньні Рады Беларускай партыі працы (БПП), якое адбылося 5 лютага, прынятае рашэньне вызваліць старшыню партыі Аляксандра Бухвостава і ягонага намесьніка Генадзя Федыніча ад займаемых пасадаў. Яны застаюцца ў партыі ў якасьці шэраговых сябраў. Пра гэта БелаПАН паведаміў сябра Рады БПТ Андрэй Еўдакімчык. Паводле яго, такое рашэньне рада партыі прыняла на падставе заяваў Бухвостава і Федыніча. Як паведаміў Еўдакімчык, галоўнай прычынай сыходу Бухвостава і Федыніча стала іх прафсаюзная дзейнасьць.

Аляксандар Бухвостаў ачольвае галіновы прафсаюз работнікаў аўтамабільнага і сельскагападарчага машынабудаваньня, а Генадзь Федыніч – прафсаюз работнікаў радыёэлектроннай прамысловасьці. Акрамя таго, яны ўваходзяць у раду Фэдэрацыі прафсаюзаў Беларусі (ФПБ), а згодна статуту “на час выкананьня ўскладзеных на іх забавязкаў ня могуць быць сябрамі кіроўных органаў палітычных партыяў”.

Новым старшынём БПТ стаў былы кіраўнік сакратарыяту Леанід Лемяшонак. Аляксандар Бухвостаў, як было запісана ў дакумэнтах, застаецца лідэрам партыі. Як сказаў Бухвостаў, рашэньне сысьці з пасады старшыні партыі ён прыняў, каб “не было спэкуляцыяў на гэтай глебе”. Паводле ягоных словаў, “статут прыняты, і мы, як сяброўская арганізацыя ФПБ, павінны яго выконваць”.