Радыёвыступы кандыдатаў падвяргаюцца цэнзуры :: Хартыя'97 :: Навiны

Старшыня Віцебскай абласной арганізацыі Беларускай сацыял-дэмакратычнай партыі (Народная Грамада) Аляксей Гаўруцікаў лічыць, што выступы некаторых кандыдатаў у дэпутаты мясцовых Саветаў у радыёэтыры падвяргаюцца цэнзуры. Як ужо паведамляў БелаПАН, 6 лютага радыёвыступ кандыдата ў дэпутаты Віцебскага абласнога Савету Аляксея Гаўруцікава ня выйшаў у этыр. У сваім выступе Гаўруцікаў зьвярнуўся да пракурора вобласьці з просьбай разабрацца з сытуацыяй, калі высокапастаўленыя асобы вобласьці і Віцебску парушаюць “закон аб зваротах грамадзянаў”, ужо два месяцы не даючы справаздачу на запыт сацыял-дэмакратаў.

Спэцыялісты абласнога тэлерадыёаб’яднаньня зьнялі гэты выступ з этыру і накіравалі запыт адносна зьместу выступу ў Цэнтральную выбарчую камісію. Паводле Аляксея Гаўруцікава, ЦВК даў заключэньне, што адзін з абзацаў выступу ўтрымлівае абразу ў адрас службовых асобаў, таму яго нельга выпускаць у этыр. “У сваім выступе я паказаў на парушэньне ўладамі Канстытуцыі краіны, -- патлумачыў Аляксей Гаўруцікаў ў інтэрвію БелаПАН. – Напэўна, менавіта гэтым я і абразіў чыноўнікаў”.

У суботу, у час, адведзены Аляксею Гаўруцікаву для радыёвыступу ўжо як кандыдата ў Віцебскі гарадзкі Савет, зь ягонай згоды прагучаў тэкст ягонага звароту, але з выразаннымі прапановамі, якія ЦВК палічыў абразьлівымі. Разам з тым, факт зьняцьця з этыру свайго выступу і рашэньне ЦВК Аляксей Гаўруцікаў вырашыў абскардзіць у Вярхоўным судзе.

Акрамя таго, у суботу рэдактар абласной тэлевізіі і радыё зьняў з этыру выступ яшчэ аднаго прадстаўніка Віцебскай абласной арганізацыі БСДП (НГ) Івана Пракапца -- адзінага канкурэнта на выбарах у Віцебскі гарсавет па 29-ай акрузе дзейнага старшыні Савету Генадзя Грыцкевіча. Адбылося гэта таму, што ў тэксьце выступу нібыта зьмяшчалася абраза парлямэнту краіны: Іван Пракапец казаў пра тое, што парлямэнт “адзінадушна прыняў антынароднае заканадаўства”, якое, на яго погляд, уціскае правы прадпрымальнікаў. Гэтыя дзеяньні прадстаўніка абласнога тэлерадыёаб’яднаньня таксама могуць быць абскарджанымі.

“Я лічу, што гэтыя дзеяньні груба парушаюць 33 артыкул Канстытуцыі Рэспублікі Беларусь, якая забараяе цэнзуру, -- лічыць Аляксей Гаўруцікаў. -- А гэта ні што іншае, як цэнзура. Паводле закона мусціь быць так: я выступіў, а калі што ня так – карайце. А здымаць з этыру – ня маеце права. Я лічу, што да прадстаўнікоў нашай партыі занадта прадузята ставяцца”.