Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Сташыня Фэдэрацыі прафсаюзаў Беларусі Леанід Козік гатовы ініцыяваць вылучэньне кандыдатуры Аляксандра Лукашэнкі на наступны прэзыдэнцкі тэрмін. “Прыйдзе час, і яго гатовы буду вылучыць дзейнага прэзыдэнта на наступны тэрмін”, -- сказаў Козік на сёньняшняй прэс-канфэрэнцыі ў Менску. Кіраўнік прафсаюзаў заявіў пра тое, што “гатовы вылучыць Лукашэнку ня толькі на трэці, але і на пяты тэрмін”.
Лібэральна-дэмакратычная партыя Беларусі пад кіраўніцтвам Сяргея Гайдукевіча зьвярнулася да прэзыдэнта Парлямэнцкай асамблеі АБСЭ Бруса Джорджа з прапановаю наданьня статуса “палаце прадстаўнікоў” у Парлямэнцкай асамблеі АБСЭ. Гэткім чынам, як гаворыцца ў калябаранцкім звароце ЛДПБ, партыя пацьвердзіла сваю прыхільнасьць “духу канструктывізму і супрацоўніцтва”. Трэба сказаць, зварот у такую ўплывовую эўрапейскую структуру складзены ЛДПБ вельмі няграматна і ўяўляе сабой набор безгустоўных і напышлівых фразаў. Так, напрыклад, дэпутаты нелігітымнага парлямэнту называюцца лібэрал-дэмакратамі “гражданами нашей общей любимой родины”... Пры гэтым, абараняючы “палатку” , ЛДПБ усяго толькі “спадзяецца, што дадзены крок з боку АБСЭ пацягне такія ж крокі ў адказ”.
У панядзелак пройдзе прэсавая канфэрэнцыя кіраўніка офіса АБСЭ ў Менску Эбэргарда Хайкена. Пра гэта паведамляе Радыё Рацыя. Нагадаем, што новы кіраўнік офіса АБСЭ ў Беларусі Эбэргард Хайкен прыбыў у Менск 9 лютага. У аэрапорце сп.Хайкен адмовіўся даваць нейкія камэнтары адносна сваёй будучай дзейнасьці на пасадзе кіраўніка офіса і запрасіў журналістаў на прэс-канфэрэнцыю.
Міжнародная экспэртыза высьветліла, што дырэктар інфармацыйнага агенцтва “Украінскія навіны” Міхаіл Каламіец сам скончыў жыцьцё самагубствам. Такая заява прагучала сёньня ў Кіеве. На дадзены момант няма падставаў лічыць, што Каламіец быў забіты ці даведзены да самагубства, аднак пасьмяротная судова-псыхалягічная экспэртыза ўсё ж прызначаная для таго, каб вызначыць псыхалягічны стан Каламійца перад самагубствам. У канцы кастрычніка дырэктар “Украінснкіх навінаў” быў знойдзены павешаным у лесапаркавай зоне Маладэчна ў Беларусі.
Беларускія пісьменьнікі лічаць, што рэформа мовы мусіць шырока абмяркоўвацца ў грамадзтве. Пра гэта ў інтэрвію “Медиафакту” заявіў старшыня Саюзу беларускіх пісьменьнікаў Алесь Пашкевіч. Паводле яго, Раду Саюза пісьменьнікаў цікавяць пытаньні ўнясеньня зьменаў у беларускую мову. Тым больш, сказаў літаратар, пісьменьнікі заўсёды прымалі актыўны ўдзел у рашэньні гэткіх пытаньняў. Камэнтуючы заплянаваныя зьмены ў правапісе, Алесь Пашкевіч адзначыў, што большасьць зь іх “адказваюць цяперашней неабходнасьці”.
Падчас міжнароднай канфэрэнцыі ў Дортмундзе, якая праходзіла пры канцы мінулага тыдня, карэспандэнт Радыё Свабода Віталь Цыганкоў узяў інтэрвію ў спадара Івана Каеджыкава, кіраўніка аддзелу палітычных справаў Рады Эўропы, адказнага за стасункі зь Беларусьсю. Натуральна, што размова падчас гэтага інтэрвію зайшла і пра кампанію мясцовых выбараў у Беларусі.
Уладзімер Пуцін, які падае сябе прыхільнікам прымірэньня паўсюль – як у ірацкім крызысе, так і ўзаемаадносінах паміж Эўропай і ЗША, -- публічна не выказаў у Парыжы ні слова адносна вайны ў Чачэніі, распачатай тры з паловаю гады таму. У панядзелак 10 лютага, калі расейскага прэзыдэнта прымалі ў Елісейскім палацы, сотні маніфэстантаў праходзілі ад Цэнтра Пампіду да пляца Бастыліі з крыкамі “Пуцін – забойца” і асуджалі “ганебнае маўчаньне” Францыі.
Вечарам 11 лютага ў Менск з рабочым візытам прыбыў намесьнік міністра замежных справаў Ісламскай Рэспублікі Іран Махсэн Амінзадэ. Візыт, заплянаваны да 13 лютага, зьвязаны з падрыхтоўкаю візыту ў Беларусь іранскага прэзыдэнта Махамада Хатамі.
28 лютага ў Беларускім дзяржаўным унівэрсытэце выступіць зь лекцыяй Аляксандар Лукашэнка. Тэма лекцыі: “Гістарычны выбар Беларусі”. Беларускі лідэр прапаноўвае для абмеркаваньня пытаньні нараджэньня і разьвіцьця беларускага народа, беларускай дзяржаўнасьці. Частка лекцыі будзе прысьвечаная прыярытэтам унутранай і замежнай палітыкі краіны. Пасьля лекцыі Аляксандар Лукашэнка адкажа на пытаньні выкладчыкаў і студэнтаў. Сваё пытаньне Лукашэнку кожны можа задаць, адправіўшы на сайт радыё БДУ радио БГУ «Юністар». Пытаньні для Лукашэнкі прымаюцца да 20 лютага.
У Лібіі плянуецца стварыць сумеснае беларуска-лібійскае прадпрыемства па рэканструкцыі энэргетычных аб’ёмаў. Перамовы аб арганізацыі СП пройдуць у рамках візыту ў гэтую краіну 16-20 лютага дэлегацыі беларускіх энэргетыкаў на чале з дырэктарам ЗАТ “Белзьнешэнэрга” Аляксандрам Рагоўцавым.
Шэсьць біскупаў зь Беларусі, а таксама галава грэка-каталіцкай царквы Беларусі сустрэліся з Папам Рымскім 10 лютага ў часе наведваньня Ватыкану. Мэта іх візыту – даклад пра становішча справаў аб дыяцэзіях, якія яны ўзначальваюць. У часе сустрэчы Папа Рымскі адзначыў, што Беларусь – былая савецкая рэспубліка, якая перажыла найменшыя зьмены пасьля падзеньня камуністачнае сыстэмы і мінімальна інтэграваная з астатняй часткаю Эўропы. Ян Павал ІІ заявіў, што, нягледзячы на цяжкасьці, якія перажывае Беларусь у палітычнай і эканамічнай сфэрах, каталіцкі касьцёл краіны адраджаецца і павінен узяцца за плянаваньне будучыні.
Зімовая сьпячка 13:30, 12/02/2003, Віктар Аляшкевіч, “Вечерний Минск”
На чарговай гарадзкой плянёрцы першы намесьнік кіраўніка сталічнай улады Мікалай Ярохаў падсумаваў вынікі працы ў студзені. Менск перавыканаў заданьне па тэмпах росту прамысловай вытворчасьці (109,2 адсоткі замест 104,5), але ў той самы час не справіўся з шэрагам іншых паказьнікаў. Асабліва складаная сытуацыя ўзьнікла з выпускам тавараў народнага спажываньня, у тым ліку па харчовай групе.
“Этот год станет годом защиты нашего населения, в том числе от родного правительства” – паабяцаў учора Аляксандар Лукашэнка, прамова якога на справаздачы ўрада па выніках 2002 году мела шмат абяцаньняў па паляпшэньні ў сацыяльнай сфэры. Кіраўнік Беларусі запатрабаваў ад урада спыніць рост жыльлёва-камунальных, транспартных тарыфаў для насельніцтва, а таксама перагледзіць аб’ём платных паслуг у ахове здароўя і адукацыі. “Ни шагу вперед в ценах!” – высунуў Лукашэнка яшчэ адзін лёзунг. Між тым увядзеньне платных тарыфаў у ахове здароўя і адукацыі летась было ўхвалена асабіста самім Лукашэнкам.
СП ААТ "Мабільная лічбавая сувязь" дае камэнтар адносна ўзаемадзеяньня з ААТ СП "БелСел". Нагадаем, што з 5 лютага 2003 году частка абанэнтаў кампаніі “БелСел” ня можа ажыцьцяўляць выклікі ў сетку СП ААТ “МЛС”. Пропуск трафіка быў блякаваны з боку СП ААТ “МЛС” напярэдадні запуска кампаніяй “БелСел” сыстэмы сотавай сувязі новага стандарту cdma2000.
Прэм’ер-міністар Беларусі Генадзь Навіцкі ацаніў працу Савета Міністраў у 2002 годзе як незадавальняючую. У справаздачы перад Аляксандрам Лукашэнкам кіраўнік урада прызнаў, што з 16 важнейшых паказьнікаў сацыяльна-эканамічнага разьвіцьця, выкананыя толькі восем. Разам з тым Генадзь Навіцкі падкрэсьліў, што ёсьць пэўныя перадумовы для выкананьня паказьнікаў, заплянаваных на сёлета, і зьвярнуўся да кіраўніка дзяржавы з просьбай “даць магчымасьць яшчэ папрацаваць”.
Паводле апэратыўных дадзеных Міністэрства працы і сацыяльнай абароны, на 1 лютага сёлетняга году запазычанасьць платнікаў абавязковых страхавых унёскаў перад Фондам сацыяльнай абароны насельніцтва міністэрства павялічылася да 157,4 мільярдаў рублёў.
Адразу пасьля новага году быў прыняты бюджэт краіны на 2003 год, дзе на рэалізацыю чарнобыльскіх ільготаў заплянавана ўсяго 25 млрд. рублёў, у той час як пазыка па “чарнобыльскіх” выплатах за леташні год засталася і пераўзышла 16 млрд.
Прэм’ер-міністар Беларусі Генадзь Навіцкі, выступаючы перад Аляксандрам Лукашэнкам з справаздачаю аб выніках працы народнай гаспадаркі за 2002 год, падкрэсьліў, што летась у будаўнічым коплексе выкананыя ўсе найважнейшыя мэтавыя паказьнікі. Кіраўнік беларускага ўрада адзначыў, што адна з асноўных задач на 2003 год – давесьці аб’ём капітальнага рамонту жыльлёвага будаўніцтва да 610 тысячаў квадратных мэтраў. Пры гэтым капітальны рамонт павінен уключаць цеплавую рэабілітацыю жылых дамоў, будаўніцтва мансардаў. У якасьці яшчэ адной немалаважнай задачы прэм’ер-міністар адзначыў скарачэньне спажываньня энэргарэсурсаў у жыльлёва-камунальнай гаспадарцы ня менш чым на 7 адсоткаў.
І сапраўды, навошта? У законе “Аб абменных прыватызацыйных чэках РБ”, прынятым яшчэ ў 1993 годзе, сказана, што “прыватызацыйны чэк забясьпечаны дзяржаўнай уласнасьцю, якая падлягае бязвыплатнай перадачы грамадзянам Рэспублікі Беларусь, сьведчыць пра права ягонага ўладальніка на долю ў прыватызуемай дзяржаўнай уласнасьці”. Адказваючы на нашае пытаньне “Якім чынам грамадзяне краіны могуць выкарыстоўваць чэкі “Маёмасьць”? Спэцыяліст Фонду дзяржаўнай маёмасьці патлумачыў, што яны могуць іх абмяняць на акцыі адкрытых акцыянэрных таварыстваў, якія належаць дзяржаве.
Пішу вам ад імя маладых жыхароў горада Воршы, якія хутка зьбіраюцца стаць мамамі. У выступах высокіх беларускіх чыноўнікаў вельмі часта гучыць, што нараджэньне дзіцяці -- ганаровы і паважаемы дзяржаваю крок кожнай маладой сям’і. У рэчаіснасьці ўсё інакш. Пачынаючы ад мізэрнай штомесячнай дапамогі на дзіцёнка і завяршаючы дародавым мэдычным абслугоўваньнем.
Гаспадаркі Беларусі на 14 адсоткў забясьпечаныя насеньнем кукурузы. З 15,4 тысячаў тонаў, неабходных для цяперашнега севу, сельгаспрадпрыемствы маюць толькі 1780 тонаў. Да веснавых прац засталося больш за два месяцы, і Мінсельгасхарч закляпочаны павольнымі тэмпамі пастаўкі насеньня гэтай культуры.
Уведзеныя новыя правілы рэгістрацыі і кантролю пры перасячэньні мяжы фізычнымі асобамі. Пра гэта “Медиафакту” паведамілі ў прэсавай службе мытні “Заходні Буг”. Новыя правілы ўведзеныя ў адпаведнасьці з пастановаю мытнага камітэту аб перасоўваньні фізычных асобаў праз мяжу Беларусі тавараў і транспартных сродкаў, яго дзеяньне прыпынілася на год праз неўкамплектаванасьць службаў мытнага кантролю кампутаровай тэхнікай.
У Беларусі колькасьць ВІЧ-інфіцыраваных, паводле афіцыйных дадзеных на 1 лютага сёлетняга году, склала 4 829 чалавек. Толькі за студзень на тэрыторыі краіны зарэгістравана 57 выпадкаў ВІЧ-інфэкцыяў. Летась вырасла колькасьць адміністратыўных тэрыторыяў, уцягнутых у эпідпрацэс. Іх налічваецца ўжо больш за 130.
Паважаная рэдацыя! Упрошваем вас, надрукуйце наш ліст тэрмінова. Размова ідзе пра жыцьцё і сьмерць у літаральным сэнсе. У нас у пад’езьдзе ў кватэры 24 памірае хворы самотны інвалід 1-ай групы Катлянік А.А. Некалькі месяцаў таму памерла ягоная маці, якая ўсё жыццьё даглядала за сынам, не аддавала яго ў інтэрнат. Як толькі здарылася гэтае няшчасьце, мы паведамілі ў міліцыю і патэлефанавалі ў выканкам Ленінскага раёну з просьбай аформіць інваліда. Участковы міліцыянт ведае, што чалавек застаўся адзін (малодшчы брат не лічыцца, бо не выходзіць з турмаў). Аднак прадстаўнік праваахоўчых органаў сказаў нам, што гэтае пытаньне яго не датычыць. У пачатку студзеня мы напісалі ў Ленінскі выканкам з просьбай заняцца інвалідам. Адказ прыйшоў праз месяц. Столькі часу спатрэбілася кіраўніцтву сацыяльнай абароны, каб паведаміць нам, што наш ліст пераслалі ў органы аховы здароўя. Добрая сацыяльная абарона, няма што і сказаць.
, iнформэр
