Беларусь рыхтуецца да візыту прэзыдэнта Ірану :: Хартыя'97 :: Навiны

Вечарам 11 лютага ў Менск з рабочым візытам прыбыў намесьнік міністра замежных справаў Ісламскай Рэспублікі Іран Махсэн Амінзадэ. Візыт, заплянаваны да 13 лютага, зьвязаны з падрыхтоўкаю візыту ў Беларусь іранскага прэзыдэнта Махамада Хатамі.

Як паведамляе прэсавая служба беларускага МЗС, 12 лютага пройдуць кансультацыі паміж замежнапалітычнымі ведамствамі Беларусі і Ірану. Заплянаваны таксама шэраг сустрэчаў прадстаўнікоў МЗС Ірану з кіраўніцтвам адміністрацыі Аляксандра Лукашэнкі, “палатай прадстаўнікоў”, Міністэрствам прамысловасьці Рэспублікі Беларусь.

Між тым, у Беларусі зарэгістравана усяго адно прадпрыемства з 100-адсоткавым іранскім капіталам і адно сумеснае беларуска-іранскае прадпрыемства. Між урадамі дзьвюх краінаў заключаны шэраг пагадненьняў -- аб гандлёва-эканамічным супрацоўніцтве, аб ўзаемнай абароне інвэстыцыяў, аб міжнароднай аўтамабільнай камунікацыі, аб паветраных камунікацыях і супрацоўніцтве ў сфэры культуры і іншыя, паведамляе БелаПАН. Падпісаны мэмарандумы аб узаемаразуменьні і супрацоўніцтве ў сфэры культуры, адукацыі, спорту і турызма. Таваразварот паміж дзьвюма краінамі з 89 тысячаў даляраў ЗША ў 1993 годзе павялічыўся да 38,7 мільёнаў у 2001 годзе. Беларускі экспарт у Іран дамінаваў над імпартам з гэтай краіны і склаў у 2001 годзе 37,9 мільёнаў даляраў. Асноўныя артыкулы беларускага экспарту – штучныя валокны, калійныя ўгнаеньні, вырабы з сталі, штучныя корпусныя ніці, палімеры этылену, электронныя інтэгральныя схемы, матацыклы, падшыпнікі. Імпарт з Ірану складаюць прадукты харчаваньня (таматная паста, спэцыі, садавіна), вырабы з пластмас і тавары мэдычнага прызначэньня.