А грошай усё няма... :: Хартыя'97 :: Навiны

Адразу пасьля новага году быў прыняты бюджэт краіны на 2003 год, дзе на рэалізацыю чарнобыльскіх ільготаў заплянавана ўсяго 25 млрд. рублёў, у той час як пазыка па “чарнобыльскіх” выплатах за леташні год засталася і пераўзышла 16 млрд.

Аказваецца, 16 млрд. рублёў павінна нашая дзяржава інвалідам ЧАЭС, а таксама спэцыялістам, якія калісьці былі накіраваныя на працу ў зону павышанага радыяцыйнага забруджваньня. Грашовай кампэнсацыяй не пабачылі таксама людзі, якія жывуць ля “зоны”. Між іншым, гэтая сума расьце з самага моманту аварыі.

Больш за чатыры месяцы людзі не атрымоўваюць “чарнобыльскай” дапамогі. А для многіх гэтыя грошы адзіным сродкам існаваньня. Студэнтам, пацярпелым ад аварыі, надбаўка да стыпендыі складае 50 адсоткаў. Для маці ў дэкрэтным адпачынку – гэта падвойная дзіцячая дапамога. Вось і тэлефануюць людзі па розных кіраўніцтвах з адным пытаньнем: “Калі будуць грошы?”

Дзяржава даручыла прадпрыемствам з уласнай кішэні аплаціць належныя кампэнсацыі і паабяцала ўсё вярнуць з агульнага дзяржбюджэту. Вось і давялося напісаць кіраўніцтву пацярпелых абласьцей ліст у Міністэрства фінансаў, з прашэньнем выдаць патрэбныя грошы. Аднак адказу няма, і, адпаведна, разьлічваць на кампэнсацыі не выпадае.