У Беларусі расьце ўлада чыноўнікаў :: Хартыя'97 :: Навiны

У Беларусі не засталося практычна ніводнай дзяржустановы, службовыя асобы якой былі б абранымі, а не прызначанымі. Расьце неабмежаваная ўлада чыноўнікаў зь невялікімі заробкамі. Як паведамляе карэспандэнт “Известий”, такая выснова гучыць у чарговым дакладзе Беларускага Гэльсынскага камітэту ў Міжнародную Гэльсынскую фэдэрацыю па правох чалавека.

Аўтары дакладу адзначаюць, што ўрад спрабуе павысіць сваю папулярнасьць пад лёзунгам барацьбы з карупцыяй. Крымінальны кодэкс і заканадаўства ў сфэры эканомікі дазваляе практычна любога абвінаваціць у парушэньнях, што і выкарыстоўваецца для застрашэньня і маніпуляваньня чыноўнікамі.

Камітэт дзяржкантролю, які падпарадкоўваецца асабіста прэзыдэнту, кантралюе выканананьне заканадаўчых актаў, якія рэгулююць адносіны дзяржаўнай уласнасьці, гаспадарчыя, фінансавыя і падаткавыя зносіны. У выніку дзейнасьці Камітэту сталі частымі выпадкі крымінальнага перасьледу кіраўнікоў буйных дзяржаўных прадпрыемстваў і камэрцыйных кампаніяў, банкаў, органаў выканаўчай улады. У 2002 годзе пракуратура накіравала ў суд 337 крымінальных справаў аб карупцыі, што на 31% пераўзыходзіць паказьнікі 2001 году.

Пры гэтым, паводле даручэньня Аляксандра Лукашэнкі распрацаваны новы праект Закону “Аб барацьбе з карупцыяй”, які прадугледжвае пашырэньне кола суб’ектаў, што падпадаюць пад дзеяньне закона, пашырэнне сьпісу карупцыйных правапарушэньняў, уведзеныя патрабаваньні да членаў сям’і службовых асобаў.