Беларусь удзельнічае ў Саміце дзяржаваў-удзельнікаў Руху недалучэньня :: Хартыя'97 :: Навiны

Міністар замежных справаў Рэспублікі Беларусь Міхаіл Хвастоў выляцеў у Куала-Лумпур (Малазія) для ўдзелу ў ХІІІ Саміце дзяржаваў-удзельніц Руху недалучэньня (РН) у якасьці кіраўніка беларускае дэлегацыі.

Як паведаміў на брыфінгу намесьнік начальніка кіраваньня інфармацыі МЗС Беларусі Андрэй Савіных, праграма знаходжаньня міністра ў Куала-Лумпур уключае ў сябе ўдзел у нарадзе міністраў замежных справаў РН, выступ у агульнапалітычнай дыскусіі, выступ на заключным паседжаньні ад імя эўрапейскіх дзяржаваў-удзельніц Руху (Беларусь, Кіпр і Мальта), удзел у абмеркаваньні праблематыкі ўдасканаленьня дзейнасьці Руху ў рамках рабочага камітэту Саміта.

Заплянаваныя і пацьверджаныя двухбаковыя сустрэчы Міхаіла Хвастова з кіраўнікамі замежнапалітычных ведамстваў Венесуэлы, Ірану, Малазіі, ЮАР, Вьетнаму, Замбіі, Сурынама, Індзіі, Эгіпта, Лібіі і Рэспублікі Карэі.

Адбудзецца таксама сустрэча з Генэральным дырэктарам Харчовай і сельскагаспадарчай арганізацыі ААН (ФАО) Жакам Дзіуфам.

25 лютага міністар замежных справаў Беларусі будзе прымаць удзел ва ўрачыстай цырымоніі прыняцьця Заключнага дакумэнту Саміта і Куала-Лумпурскай дэклярацыі.

26 лютага кіраўнік замежнапалітычнага ведамства Беларусі выляціць у Менск.