Судзьдзі прымаюць незаконыя рашэньні і хамяць :: Хартыя'97 :: Навiны

У працы судоў агульнай юрысдыкцыі ёсьць сур’ёзныя недахопы, заявіў на прэс-канфэрэнцыі старшыня Вярхоўнага суда РБ В.Сукала, і ў 2002 годзе якасьць правасудзьдзя палепшыць не ўдалося.

Вырасла ў абсалютных лічбах колькасьць адменных выракаў судоў усіх узроўняў. Дапушчана 17 выпадкаў неабгрунтаванага асуджэньня грамадзянаў. З 1020 працоўных судзьдзяў толькі 308 працавалі безпамылкова. Паводле грамадзянскіх справаў колькасьць незаконных судовых рашэньняў набліжаецца да 2 тысячаў. І калі сярэдні паказьнік адмены рашэньняў паводле грамадзянскіх справаў складае 1,2%, то рашэнні паводле такіх актуальных катэгорыяў грамадзянскіх справаў, як працоўныя і жыльлёвыя спрэчкі, спрэчкі аб кампэнсацыі ўрону маюць больш высокі працэнт брака. Паводле В.Сукалы, пакідае жадаць лепшага апэратыўнасьць правасудзьдзя. Толькі 75 судоў з 154 працавалі без парушэньня тэрмінаў.

Што тычыцца культуры правасудзьдзя, то, як заявіў В.Сукала, з амаль 1,5 тысячаў скаргаў, што паступілі летась, каля 700 – на грубасьць, хамства, фанабэрастасьць, непаважлівае стаўленьне да людзей з боку судзьдзяў. Не меншую занепакоенасьць выклікае павелічэньне з 31 ў 2001 годзе да 55 ў 2002 годзе колькасьцьі судзьдзяў, прыцягнутых да дысцыплінарнай адказнасьці. Больш за 30 судзьдзяў вызваленыя ад займаемых пасадаў – у асноўным як тыя, хто не справіўся з працай.