Нацбанк можа прапанаваць штосьці новае? :: Хартыя'97 :: Навiны

Нацыянальны банк Беларусі распрацаваў новыя прапановы па функцыянаваньні адзінай фінансавай сыстэмы з выкарыстаньнем расейскага рубля ў якасьці адзінай валюты. Як паведамілі ў Нацбанку, яны будуць пададзеныя для абмеркаваньня ў часе сустрэчы кіраўнікоў урадаў і цэнтральных банкаў Беларусі і Расеі 27 лютага сёлетняга году ў Маскве. Падрабязнасьці новых прапановаў у Нацбанку пакуль не раскрываюць.

У той самы час у Нацбанку падкрэсьлілі, што пазыцыя беларускага боку ў частцы стварэньня адзінага эмісійнага цэнтру “саюзнае дзяржавы” Беларусі й Расеі застаецца “цалкам нязьменнай”. Беларусь па-ранейшаму сыходзіць з прынцыпа раўнапраўя і лічыць, што ролю адзінага эмісійнага цэнтру павінна выкарыстоўваць сыстэма цэнтральных банкаў, якая складаецца з Цэнтрабанка Расеі, Нацбанка Беларусі і Міжбанкаўскай валютнай рады “саюзнае дзяржавы”.

Падчас будучай сустрэчы ў Маскве расейскі і беларускі прэм’еры абмяркуюць прынцыпы функцыянаваньня расейска-беларускага эмісійнага цэнтру. Яны таксама разгледзяць магчымасьці выроўніваньня гандлёвага балянсу дзяржаваў-удзельнікаў “саюзнае дзяржавы”. Паводле вынікаў 2002 году сальда Беларусі ў гандлі з Расеяй склалася адмоўным і склала каля 1,8 млрд. даляраў. Акрамя таго, прэм’еры абмяркуюць пытаньні спагнаньня падатку на дададзеную вартасьць ва ўзаемным гандлі.