У Менск для маніторынгу мясцовых выбараў прыбылі экспэрты БДІПЧ АБСЭ :: Хартыя'97 :: Навiны

У Менск прыбылі экспэрты Бюро па дэмакратычных інстытутах і правох чалавека (БДІПЧ) АБСЭ. Раніцай 26 лютага прадстаўнікі арганізацыі сустрэліся з сакратаром Цэнтральнае камісіі Рэспублікі Беларусь па выбарах і правядзеньні рэспубліканскіх рэфэрэндумаў Мікалаем Лазовікам. У інтэрвію БелаПАН сакратар ЦВК адзначыў, што прадстаўнікі БДІПЧ АБСЭ не зьяўляюцца назіральнікамі і не прасілі ў Цэнтрвыбаркама такога статусу. Мэта місіі, сказаў М.Лазовік, правядзеньне маніторынгу выбарчай кампаніі. Вынікам гэтай працы, магчыма, стане прыняцьце рэкамэндацыяў па ўдасканаленьні выбарчага заканадаўства Беларусі.

Паводле інфармацыі М.Лазовіка, у часе сёньняшняй сустрэчы экспэрты БДІПЧ цікавіліся тым, як праводзілася арганізацыя выбарчай кампаніі, а таксама заканадаўчымі новаўвядзеньнямі ў параўнаньні з папярэднімі мясцовымі выбарамі.

Акрамя таго, экспэрты зьвярнуліся ў ЦВК з просьбай наладзіць для іх у дзень асноўнага галасаваньня – 12 сакавіка – наведваньне некалькіх выбарчых участкаў і выбарчых камісіяў. Паводле М.Лазовіка, “ЦВК гатовая падаць супрацоўнікам арганізацыі ўсю неабходную інфармацыю”.

Сёньня экспэрты БДІПЧ таксама сустрэліся з прадстаўнікамі партыяў, якія ўваходзяць у Канфэдэрацыю “За сацыяльныя перамены” -- Лібэральна –дэмакратычнай партыі, Партыі камуністаў Беларускай, Беларускай сацыял-дэмакартычнай партыі (Народная Грамада), Беларускай партыі працы і Беларускай партыі жанчын “Надзея”. У часе размовы экспэртам пададзены зварот канфэдэрацыі, накіраваны 19 лютага ў ЦВК. У дакумэнце гаворыцца аб недэмакратычнасьці выбарчай кампаніі.