Валеры Фралоў і Ўладзімер Парфяновіч прымуць удзел у Народным маршы :: Хартыя'97 :: Навiны

Прадстаўнікі дэпутацкай групы “Рэспубліка” Валеры Фралоў і Ўладзімер Парфяновіч увайшлі ў склад аргкамітэту па правядзеньні Народнага маршу “За лепшае жыцьцё!”, які адбудзецца ў Беларусі 12 сакавіка. Трохразовы алімпійскі чэмпіён Уладзімер Парфяновіч лічыць, што ўдзел у гэтай акцыі пратэсту – ягоны абавязак. “Бо ў Народным маршы будуць удзельнічаць людзі, якія жадаюць зьмяніць сытуацыю. Я абавязаны быць зь людзьмі, якія мяне абралі і якім сёньня жывецца вельмі цяжка”, -- заявіў Парфяновіч у інтэрвію прэс-цэнтру Хартыі.

-- Чаму Вы вырашылі падтрымаць Народны марш “За лепшае жыцьцё!”?

-- Бо ў Народным маршы будуць удзельнічаць людзі, якія жадаюць зьмяніць сытуацыю. Я абавязаны быць зь людзьмі, якія мяне абралі і якім сёньня жывецца вельмі цяжка.

-- Ці не баіцеся Вы ўдзельнічаць у акцыі, бо гэта сёньня так нетыповва для беларускіх “парлямэнтараў”?

-- Такога, каб у акцыі ўдзельнічалі прадстаўнікі “палаты прадстаўнікоў”, вядома, ніколі не было. Але калі людзі выйшлі на вуліцы, то дэпутат павінен быць з сваймі людзьмі. Яго ж абралі не для таго, каб ён сядзеў толькі ў цёплым кабінэце? І ўдзельнічаць у акцыі пратэсту я не баюся. Я -- грамадзянін Рэспублікі Беларусь, я дзейнічаю ў рамках закону.

-- Ці зьбіраецеся Вы заклікаць сваіх калег па парлямэнцкай дзейнасьці ўдзельнічаць у вясновай акцыі пратэсту?

-- Няхай гэта застанецца на сумленьні кожнага майго калегі-дэпутата.

-- Як канкрэтна Вы зьбіраецеся дапамагчы правядзеньню гэтае акцыі? Ці будзеце вы дабівацца ад уладаў дазволу на правядзеньне акцыі, каб яна прайшла выключна мірна?

-- Натуральна. Я хацеў бы прымаць удзел у інструктыраваньні войскаў, якія будуць задзейнічаныя ў ахове правапарадку ў час правядзеньня Народнага маршу. Я хацеў бы патлумачыць ім, што ў гэтай акцыі будуць удзельнічаць такія самыя людзі, як і тыя, хто ў гэты час ляжыць на канапах і глядзіць тэлевізар, і адрозьніваюцца яны адзін ад аднога толькі тым, што першыя жадаюць лепшага жыцьця, што ўсе яны – грамадзяне Рэспублікі Беларусь. Акрамя таго, у рамках Канстытуцыі і законаў я буду садзейнічаць таму, каб сталічныя ўлады дазволілі правядзеньне Народнага маршу ў замоўленым фармаце.

--Акрамя ўдзелу ў Народным маршы, як яшчэ канкрэтна вы будзеце садзейнічаць паляпшэньню жыцьця насельніцтва?

--Заканадаўчымі мерамі. У бліжэйшы час, напрыклад, мы паспрабуем распрацаваць закон аб камунальных плацяжох. У пачатку сакавіка адбудзецца працэс у Канстытуцыйным судзе па праблемах так званых платных мэдычных паслуг. Мы лічым, што гэта парушае Канстытуцыю Рэспублікі Беларусь, якая гарантуе бясплатнае мэдычнае абслугоўваньне.

Прэс-цэнтар Хартыі пацікавіўся таксама ў калегі Ўладзімера Парфяновіча, генэрала Валеры Фралова, ці не баіцца ён наступстваў гэтага кроку:

-- Не баюся. Страхі ўсе пакінуў. Надакучыла баяцца. Хопіць. У рэшце рэшт, я жыву ў роднай краіне.

Што тычыцца прычынаў, якія падштурхнулі яго стаць адным з арганізатараў Народнага маршу, то, паводле словаў генэрала, “абстаноўка штурхае на такія меры”. “Правядзеньне масавых акцыяў – гэта адзін з спосабаў, які можа паўплываць на ўладу. І яго трэба выкарыстоўваць, бо сытуацыя ў краіне катастрафічная”, - заявіў Фралоў.