«Белтрансгаз» гарыць сінім полымем :: Хартыя'97 :: Навiны

Вынікі праверкі “Белтрансгазу” абмеркавала калегія Камітэту дзяржкантролю. Як паведамляе прэс-цэнтар КДК, выяўленыя сур’ёзныя недахопы ў працы прадпрыемства.

Перабоі з пастаўкамі газу, непразрыстасьць разьлікаў за паліва, завышэньне прыбытку, блытаніна ва ўзаемных забавязках з расейскімі партнэрамі – такія асноўныя памылкі зафіксаваныя кантралёрамі. Між тым, як падкрэсьліў на паседжаньні калегіі старшыня Камітэту дзяржкантролю А.Тозік, ад эфэктоўнасьці дзейнасьці “Белтрансгазу” шмат у чым залежыць эканамічная бясьпека краіны.

Комплексны аналіз паказаў, што падвышэньне тарыфаў на прыродны газ, што выклікае такое раздражненьне ў спажыўца, адбываецца ня толькі па аб’ектыўных прычынах. Да росту затрымак прыводзіць нерацыянальнае выдаткаваньне сродкаў пры закупках энэрганосьбітаў і ягоным транзыце, пры ажыцьцяўленьні вэксельных разьлікаў, правядзеньні будаўнічых прац і закупках таварна-матэрыяльных каштоўнасьцяў.

Прапановы КДК па зьмяншэньні выдаткаў галіны і зьніжэньні тарыфаў на прыродны газ рыхтуюцца да адпраўкі ў Міністэрства энэргетыкі і ўрад.

Шмат выдаткаў нясе сыстэма падрыхтоўкі кадраў у прафэсійна-тэхнічных вучэльнях. Маштабы навучаньня спэцыялістаў не адпавядаюць патрэбам рынку працы: штогод незапатрабаванымі застаюцца каля 10 тысячаў выпускнікоў вучэльняў (каля 20 адсоткаў ад агульнай колькасьці). На дапамогу па беспрацоўю і перападрыхтоўку “лішніх" дзяржава выдаткуе больш за 60 мільёнаў рублёў штомесяц.

112 работнікў адукацыйнай падгаліны прыцягнуты да адміністратыўнай адказнасьці, 142 -- да дысцыплінарнай (у тым ліку 3 зьнятыя з пасадаў), распачата 7 крымінальных справаў.