Мінабароны ЗША пацьвярджае інфармацыю " Wprost" :: Хартыя'97 :: Навiны

Міністэрства абароны ЗША плянуе перабазаваць ваенныя базы ЗША зь Нямеччыны, Вялікабрытаніі і Італіі ў Польшчу, Вэнгрыю, Румынію і Баўгарыю – бліжэй да “гарачых кропак” Бліжняга і Сярэдняга Ўсходу.

Гэтая інфармацыя, распаўсюджаная "Washington ProFile", ускосна пацьвярджае публікацыю ў польскім часопісе "Wprost" аб перадыслякацыі шэрагу вайсковых базаў з ФРГ у Польшчу. Паводле дадзеных польскага часопісу, адна з натаўскіх авіябазаў будзе знаходзіцца за сотню кілёмэтраў ад мяжы зь Беларусьсю, у Менску Мазавецкім.

Як перадае "Washington ProFile", колькасьць амэрыканскіх войскаў за межамі ЗША скарачаецца апошнія 20 гадоў. Калі ў 1980 годзе за мяжой служылі амаль 689 тыс. амэрыканскіх жаўнераў і афіцэраў, то ў 1990 годзе іх колькасьць зьменшылася да 610 тыс. Паводле Цэнтру абароннай інфармацыі і прэс-службы НАТО, у 2001 годзе больш за 255 тыс. жаўнераў і афіцэраў ЗША праходзілі службу за межамі краіны. Усяго ва ўзброеных сілах ЗША ў сьнежні 2002 году служылі 1413,6 тыс. вайскоўцаў і каля 645 тыс. грамадзянскіх асобаў. Прыкладна 117 тыс. жаўнераў і афіцэраў ЗША расквартэраваныя ў Эўропе, дзе яны знаходзяцца з 1945 году. У Вялікабрытаніі служаць каля 11 тыс. амэрыканцаў, у асноўным, яны належаць да ваенна-паветраных сілаў. У Нямеччыне раквартэраваныя 71 тыс. жаўнераў і афіцэраў, большая частка якіх служаць у пяхотных і танкавых частках. Італія, дзе стала дыслякуюцца 23 тыс. вайскоўцаў, зьяўляецца адной з галоўных базаў ваенна-марскога флёту ЗША. У Пентагоне лічаць, што гэтыя базы шмат у чым згубілі сваё значэньне, бо ствараліся ў эпоху халоднае вайны для супрацьдзеяньня магчымаму нападу з боку СССР. Таму амэрыканскія вайсковыя базы ў Заходняй Эўропе скароцяць, у ЗША адправяцца сем’і вайскоўцаў.