Масква – самы небясьпечны горад Эўропы :: Хартыя'97 :: Навiны

Самым бясьпечным горадам у сьвеце зьяўляецца Люксамбург – 133,5 балы, на другім месцы знаходзяцца сталіца Фінляндыі Гэльсынкі, Сынгапур і яшчэ тры швайцарскія гарады -- Цурых, Жэнева і Бэрн. Усе яны атрымалі 126,5 балаў. Гэтыя дадзеныя агучыла лёнданская кампанія сацыялягічных дасьледваньняў “Mercer Human Resources Councelling”, якая складае штогадовы сьпіс рэйтынгаў 215 гарадоў.

У параўнаньні з гарадамі Заходняе Эўропы, большасьць гарадоў Усходняе Эўропы атрымалі нізкія ацэнкі. Самымі бясьпечнымі ў гэтым сьпісе лічацца сталіца Славакіі Браціслава і Славеніі – Любляна, якія атрымалі 56 месца і па 104,5 балы. Вільню дзеліць трэцяе месца з сталіцай Чэхіі – Прагай. Талін у гэтых дасьледваньнях атрымаў 82 месца і 96 балаў. Самым небясьпечным горадам Усходняе, дый і ўсёй Эўропы прызнаная Масква – 184 месца і 48,5 балы.

Бясьпека гарадоў ацэньвалася па ўзроўню злачыннасьці, эфэктыўнасьці праваахоўчых органаў і ўнутранай стабільнасьці, сацыяльнай і эканамічнай інфраструктуры і стану грамадзкага транспарту. Гарады параўноўваліся зь Нью-Ёркам, які быў уганараваны 100 баламі.

Самым небясьпечным у сьвеце горадам прызнаная сталіца Цэнтральна-Афрыканскай Рэспублікі – Бангі: толькі 21,5 балаў. Пасьля перавароту 2001 году ў гэтым горадзе да гэтага часу надзвычай небясьпечна.

"Mercer Human Resources Councelling" зьяўляецца адной з найуплывовых у сьвеце сацыялягічных кансультатыўных кампаніяў, якая мае 13 тысячаў супрацоўнікаў у 40 краінах сьвету.