Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Два бакі медалю 16:16, 06/03/2003, Людміла Гразнова, каардынатар Хартыі`97 па правох чалавека
Кроніка парушэньняў правоў чалавека ў лютым 2003 году
Прыніжэнне чалавечай годнасьці і галеча народа – два бакі аднаго і таго ж медаля, дыктатуры. Цяперашні беларускі «парадак» не зьяўляецца выключэньнем, ён не адрозьніваецца ад выпадку Маркаса на Філіпінах ці Сухарта ў Інданэзіі. Яшчэ не прыйшоў час агучыць ценявое накапленьне асабістага багацьця кляну Лукашэнкі. Пакуль удаецца толькі асьвятляць бачны бок «парадку» -- прыніжэньне чалавечай годнасьці і парушэньняў правоў чалавека. Праўда, і гэта магчыма толькі ў інтэрнэце.
Эўрапейскі зьвяз зноў заклікае беларускія ўлады прыняць усе неабходныя меры для стварэньня ў Менску спрыяльных умоваў працы новага офісу Арганізацыі па бясьпецы і супрацоўніцтву ў Эўропе і захаваньня мандату місіі. Пра гэта гаворыцца ў заяве Эўразьвязу, распаўсюджанай амбасадаю ФРГ у Беларусі 5 сакавіка.
“Пакуль ня позна, трэба ўпісвацца ў дэмакратычныя стандарты, прадэкляраваныя Канстытуцыяй 1994 году, пакаяцца, аддаць на суд віноўных у зьнікненьні вядомых палітыкаў, і тым самым зьняць зь сябе хоць трошкі адказнасьці за тое зло, якое ўлада ўчыніла ў пэрыяд, пачынаючы з рэфэрэндуму 1996 году”, -- заявіў у інтэрвію прэсаваму цэнтру Хартыі дэпутат Вярхоўнага Савету 13-га скліканьня, адзін зь лідэраў Аб’яднанай грамадзянскай партыі, былы палітвязень Андрэй Клімаў.
“Я не разумею, як рашэньне аб прыняцьці “палаты” ў ПА АБСЭ на зьмену сытуацыі з правамі чалавека можа рэальна паўплываць у краіне ў лепшы бок і ў першую чаргу – па расьледваньне зьнікненьняў вядомых людзей. Вы верыце, што раз такое рашэньне ПА АБСЭ прынятае, то ўлады Беларусі сёньня дазволяць міжнароднай камісіі па расьсьледваньнях працаваць у нас? Ці будзе гэта азначаць, што эўрапейскія парлямэнтары здолеюць выслухаць генэральнага пракурора Беларусі Шэймана па гэтых справах? Ці будзе азначаць, што сьледчыя здолеюць дапытаць Лукашэнку і іншых вядомых чыноўнкаў? Я думаю, што не. Таму і ня веру, што сытуацыя ў Беларусі зьменіцца да лепшага”, -- такі чынам у інтэрвію прэсавай службе АГП пракамэнтавала прыняцьце беларускага нелегітымнага “парлямэнту” ў ПА АБСЭ Ірына Красоўская – жонка вядомага беларускага бізнэсоўца і грамадзкага дзеяча Анатоля Красоўскага, які зьнік у 1999 годзе.
Група беларускіх журналістаў накіроўваецца з 7 па 12 сакавіка ў Ірак па запрашэньні амбасады гэтай краіны. Склад групы, як паведамілі “Интерфаксу” ў дыпмісіі Іраку ў Менску, яшчэ ня вызначаны і вар’іруецца ад 2 да 6 чалавек. Дакладнай інфармацыі аб авіякампаніі, якая зробіць рэйс, на дадзены момант няма. Паводле “Интерфакса”, на пралёт самалёту ёсьць дазвол камітэту па санкцыях ААН. Чакаецца, што на зваротным шляху самалёт забярэ ўсіх грамадзянаў Беларусі, якія жадаюць пакінуць Ірак. Паводле інфармацыі МЗС, на сёньня ў Іраку знаходзяцца 2 беларускія дыпляматы, 7 грамадзянаў працуюць па беларускіх кантрактах і каля 40 – па расейскіх. Тыя, хто працуе па расейскіх кантрактах, паводле дадзеных “Интерфакса”, маюць сваю схему выезда, аднак, пры жаданьні здолеюць скарыстацца дадзеным рэйсам.
На пытаньне: "Навошта Вам два мабільныя тэлефоны?" – кіраўнік дэпутацкай групы "Рэспубліка", трохразовы алімпійскі чампіён Уладзімер Парфяновіч адказаў адразу: "Каб не праслухоўвалі".
Завяршыўся афіцыйны візыт “парлямэнцкай” дэлегацыі Беларусі ў Лібію. Учора вечарам дэлегацыя “нацыянальнага сходу” на чале з старшынём “палаты прадстаўнікоў” Вадзімам Паповым прыбыла ў Менск. Двухдзённы візыт беларускіх “парлямэнтараў” у Лібію ажыцьцяўляўся па запрашэньні сакратара Ўсеагульнага народнага кангрэсу Лібіі аз-Занаці Мухамада аз-Занаці.
Для супрацьстаяньня пагрозе поўнага зьнішчэньня, беларускія мас-мэдыя неабходна аб’яднаць свае намаганьні. Пра гэта ў інтэрвію прэсаваму цэнтру Хартыі заявіў рэдактар газэты “Пагоня” Мікола Маркевіч, асуджаны да абмежаваньня волі на паўтара года за паклёп на Аляксандра Лукашэнку. “Апошнія падзеі паказваюць, што ўлада па адзіночцы можа расправіцца літаральна з усёй беларускай незалежнай прэсай. Кансалідацыя і салідарнасьць – гэта адзінае, што можа зьмяніць сытуацыю”, -- лічыць журналіст, адносна якога 4 сакавіка была зьмененая мера пакараньня. Астатні тэрмін ён будзе працаваць па месцу жыхарства ў Горадні, і сплочваць 15 адсоткаў заробку на карысьць дзяржавы.
Вельмі хутка Аляксандар Лукашэнка вернецца з горналыжнага курорту ля Сочы. Пра тое, як ён адпачывае, даведацца складана, але штосьці ўсё ж такі і ўдалося. Паводле тых, хто адпачывае ў Чырвонай Паляне, гарналыжнік з Лукашэнкі так сабе: не “чайник”, але і клясу высокага не паказвае. Кажуць, Пуцін катаецца значна лепей.
Сёлета ў РУП ВА “Беларусьнафта” назіраецца тэндэнцыя паступовага зьніжэньня аб’ёмаў здабычы нафты. Пра гэта паведаміў “Интерфаксу” начальнік аддзелу здабычы нафты канцэрну “Белнафтахім” Эдуард Сьвідэрскі.
Першы намесьнік губэрнатара Калініградзкай вобласьці Міхаіл Цыкель заклікаў беларускіх памежнікаў быць больш карэктнымі пры праверцы дакумэнтаў у калінінградзкіх цягніках. Як перадае ІА “Каскад”, пра гэта прадстаўнік адміністрацыі рэгіёну сказаў у час чарговага паседжаньня расейска-беларускай рады па супрацоўніцтву з Калінінградзкай вобласьцю, якое адбылося ў Калініградзе.
У Беларусі зьменены памер тарыфнай стаўкі першага разраду для аплаты працы работнікаў арганізацыяў, што фінансуюцца зь бюджэту і карыстаюцца дзяржаўнымі датацыямі, і базавай велічыні. З 1 сакавіка памер тарыфнай стаўкі першага разраду складае 26 тысячаў 500 рублёў (раней – 25 тысячаў), а базавая велічыня – 13 тысячаў 300 рублёў (12 тысячаў рублёў).
Харчаваньне дзяцей у дашкольных установах Баранавічаў наладжана блага. Да такой высновы прыйшлі работнікі раённага Цэнтру гігіены і эпідэміялёгіі пасьля правядзеньня чарговага рэйду-праверкі. Як паведамляе БелаПАН, праверка паказала, што амаль ва ўсіх дзіцячых садках дзеці атрымоўваюць 50 адсоткаў рыбы ад неабходнай нормы і ўсяго 20 адсоткаў яек. У дзіцячых дашкольных установах, якія належаць гарадзкому кіраваньню адукацыі, не выконваюцца нормы харчаваньня па малаку і гародніне. Акрамя таго, у меню ўсіх правераных установаў адсутнічаюць сьвежая садавіна і сыр.
Дактары-пэдагогі, якія працуюць у Баранавіцай мэдычнай вучэльні, у выпадку закрыцьця вучэбнай установы зьбіраюцца абараняць свае правы ў судзе. Пра гэта паведаміла БелаПАН дырэктар вучэльні Галіна Голубева. Паводле рашэньня Міністэрства аховы здароўя Беларусі, гэта, а таксама некаторыя іншыя мэдвучэльні краіны павінны быць закрытыя ў сувязі з скарачэньнем дзяржаўнага пляну прыёму студэнтаў, выкліканага лішкам мэдпэрсаналу сярэдняга зьвяна.
Чарговая сустрэча прэм’ераў Расеі і Беларусі Міхаіла Касьянава і Генадзя Навіцкага будзе прысьвечаная фармаваньню адзінай эканамічнай прасторы і адзінаму эмісійнаму цэнтру саюзнай валюты. Высьветлілася, што і ў гэтым і ў іншым пытаньні да адзінства Маскве і Менску далёка.
Пецярбургская броварная кампанія “Балтика” ініцыюе банкруцтва беларускай “Крыніцы”. Як паведамляе Агенцтва канфліктных сытуацыяў, у гаспадарчым судзе гораду Менску 6 сакавіка адбудзецца разгляд зыску “Балтика” да піўзавода “Крыніца”.
Афіцыйная дэлегацыя на чале з мэрам Багдаду, сталіцы Іраку, Аднанам Абэдам Хамэдам, якая знаходзіцца з візытам у сталіцы Беларусі, заўтрашні дзень пачне з знаёмства з прадукцыяй прадпрыемства “Белкамунмаш”. Затым яны наведаюць у Беларусі Дзяржаўны музэй гісторыі Вялікай Айчыннай вайны. 7 сакавіка заплянаваны візыт ірацкіх гасьцей на выставу “Ахова здароўя. Стаматалёгія Беларусі-2003”, якая праходзіць у Нацыянальным выставачным цэнтры “Белэкспа”, паведамілі карэспандэнту БЕЛТА ў аддзеле пратаколу, міжнародных грамадзкіх сувязяў Менгарвыканкаму.
Пры атрыманьні хабару 4 сакавіка затрыманы адзін з кіраўнікоў ААТ “Магілёўхімвалакно”. Як паведаміў карэспандэнту БЕЛТА прэс-сакратар Дэпартамэнту фінансавых расьсьледваньняў Камітэту дзяржкантролю Дзяніс Барташ, намесьнік дырэктара прадпрыемства па камэрцыйных пытаньнях у службовым кабінэце атрымаў хабар у 1000 даляраў ЗША ад прадстаўнікоў расейскай камэрцыйнай фірмы за “пасьпяховае вырашэньне пытаньня па выпуску высокаліквіднай прадукцыі”. Сумесную апэрацыю па выкрыцьці і затрыманьні падазраванага правялі супрацоўнікі магілёўскіх абласных кіраваньняў Дэпартамэнту фінансавых расьледваньняў, КДБ і Камітэту па барацьбе з арганізаванай злачыннасьцю і карупцыяй МУС. Затрыманы зьмешчаны пад варту, распачатая крымінальная справа.
7-9 сакавіка ў Менскім Палацы Моладзі пройдзе шосты міжнародны фестываль сярэднявечнай культуры і музыкі – "Белы замак - 2003". Пра свой удзел у фестывалі заявілі больш за 800 прадстаўнікоў рыцарскіх клюбаў Беларусі, Польшчы, Украіны, Расеі і краінаў Прыбалтыкі.
Уладальнікі каля 2-х тысячаў менскіх камэрцыйных шапікаў апынуліся перад пагрозаю страты свайго бізнэсу. Згодна з рашэньнем Менгарвыканкаму, да 1 ліпеня 2003 году аб’екты дробнарозьнічнага гандлю павінныя зьнікнуць са сталічных вуліцаў. Замест гэтага прадпрымальнікам прапануюць ісьці ў гіпэрмаркеты ці будаваць уласныя крамы. Ні на якія кампрамісы менскія ўлады не пагаджаюцца.
, iнформэр
