Суд Менску адмовіў «Балтике» у зыску аб банкруцтве «Крыніцы» :: Хартыя'97 :: Навiны

Гаспадарчы суд Менску адмовіў ААТ “Пивоваренная компания “Балтика” у зыску аб банкруцтве беларускага броварнага завода “Крыніца”. Пра гэта паведаміла ў чацьвер Агентцва канфліктыных сытуацыяў.

У 2001 годзе “Балтика” у імкненьні выйсьці на рынак Беларусі, унесла ў мадэрнізацыю “Крыніцы” 10,5 млн. даляраў і плянавала завершыць першы этап рэканструкцыі завода ў красавіку 2002 году. Аднак праца была прыпыненая ў канцы 2001 году ў сувязі з тым, што ўрад Беларусі не прыняў рашэньне аб дадатковай эмісіі акцыяў “Крыніцы” (акцыі дадатковай эмісіі плянавала выкупіць “Балтика” і атрымаць, такім чынам, кантроль над прадпрыемствам). У 2002 годзе “Балтика” ужо падавала зыск у суд пры Гандлёва-прамысловай палаце (ТПП) Расеі з просьбай прызнаць пазыку “Крыніцы” перад “Балтикой”. У 2002 годзе “Балтика” патрабавала ад “Крыніцы” вярнуць пазыку ў памеры 10,5 млн. даляраў , аднак, пасьля адмовы ініцыявала працэдуру банкруцтва завода.

“Крыніца” – буйнейшы вытворца піва ў Рэспубліцы Беларусь. Завод заснаваны ў 1975 годзе. Магутнасьці завода дазваляюць вырабляць 7,5 млн. далаў піва ў год. Да 1992 году “Крыніца” ўваходзіла ў склад ВА “Менскпіўпрам” і зьяўлялася яе галоўным прадпрыемствам. З 1992 па 2001 гады “Крыніца” працавала як арэнднае прадпрыемства, з студзеня 2001 год стала ААТ. На дадзены час капітал АТ “Крыніца” разьмеркаваны наступным чынам: дзяржаве належыць 80,57% акцыяў, працоўнаму калектыву прадпрыемства – 19,43% акцыяў.

ААТ “Пивоваренная компания “Балтика” заснаваная ў 1990 годзе, зарэгістраваная ў ліпені 1992 году. Статутны капітал – 120 млн. 572 тыс. 800 рублёў, падзелены на 107 млн. 870 тыс. 200 звычайных і 13 млн. 485 600 прывеліяваных акцыяў тыпу “А” наміналам 1 рубель. Буйнейшы акцыянэр кампаніі -- Baltic Beverаge Holding AB (58,57% акцыяў). Аб’ём інвэстыцыяў кампаніі ў 2002 годзе склаў 199 млн. даляраў (115 млн. даляраў у 2001 годзе).