Аргкамітэт Народнага маршу :: Хартыя'97 :: Навiны

Чарговае паседжаньне арганізацыйнага камітэту Народнага маршу “За лепшае жыцьцё!” прайшло 6 сакавіка ў Менску. У яго працы ўдзел прынялі каардынатары Хартыі’97 Андрэй Саньнікаў, Людміла Гразнова, намесьнік старшыні БНФ “Адраджэньне” Юры Хадыка, сябры дэпутацкае групы “Рэспубліка” Валеры Фралоў і Ўладзімер Парфяновіч, прадпрымальнік Леанід Малахаў, гісторык Валянцін Голебеў і іншыя. Абмяркоўваліся пытаньні падрыхтоўкі акцыі, якая стартуе а 18 гадзіне з плошчы Якуба Коласа ў цэнтры Менску 12 сакавіка.

Сябры аргкамітэту ўзгаднілі таксама пытаньні ўзаемадзеяньня у час правядзеньня акцыі. Удзельнікі нарады пацьвердзілі свой намер мірна пратэставаць супраць павышэньня камунальнай платы і далейшага агалечваньня народа. Мэта акцыі – выказваньне пратэсту некампэтэнтнай палітыцы ўладавых структураў, адказных за рэзкае зьніжэньне ўзроўню жыцьця беларускіх грамадзянаў, і прыцягненьне ўвагі да праблемаў непамернага падвышэньня камунальнай платы, рэальнага зьніжэньня заробнай платы, пэнсіяў, стыпэндыяў, парушэньня правоў чалавека, пагаршэньня ўмоваў прпдпрымальніцкай дзейнасьці ў Беларусі. Народны марш пройдзе пад лёзунгамі “Хопіць рабаваць людзей!”, “Зьнізіць квартпалту і камуналку!”, “Падвысіць заробкі, пэнсіі, стыпэндыі!”, “Чым карміць дзяцей?”, “Спыніць ціск на прадпрымальнікаў!”, “Ён павінен сысьці!”.