Міністар замежных справаў Кубы наведае Менск у канцы сакавіка :: Хартыя'97 :: Навiны

Міністар замежных справаў Кубы Фэліпэ Пэрэс Роке наведае ў канцы сакавіка Менск. Пра гэта “Медиафакту” паведаміў намесьнік кіраўніка кіраваньня інфармацыі беларускага замежнапалітычнага ведамства Андрэй Савіных. Паводле яго, візыт плянуецца на 28-30 сакавіка. У час візыту бакі збіраюцца абмеркаваць пэрспэктывы пашырэньня гандлёва-эканамічнага супрацоўніцтва, адзначыў А.Савіных.

Як раней паведамлялася, у Гаване напярэдадні завяршылася паседжаньне беларуска-кубінскае камісіі па гандлёва-эканамічным супрацоўніцтве. Асаблівую ўвагу чальцы камісіі будуць надзяляць пытаньням аптымізацыі дзейнасьці беларуска-кубінскага сумеснага прадпрыемства па перапрацоўцы цукру-сырца “Беллацінцукар”.

Паводле МЗС, на ўзгадненьне кубінскаму боку былі перададзеныя праекты пагадненьняў аб супрацоўніцтве ў галіне аховы здароўя, спорту, друку і інфармацыі, а таксама пакет прапановаў беларускіх прадпрыемстваў і арганізацыяў аб супрацоўніцтве ў галіне сельскагаспадарчага машынабудаваньня, вытворчасьці мэдычных прэпаратаў і лячэбна-аздараўляльных праграмаў па чарнобыльскай тэматыцы.

Наступнае паседжаньне беларуска-кубінскай сумеснай камісіі па гандлёва-эканамічным супрацоўніцтве мяркуецца правесьці ў траўні 2004 году ў Менску.