Мінюст пакрыўдзіўся на Лябедзьку :: Хартыя'97 :: Навiны

Анатоль Лябедзька “ігнаруе заканадаўства краіны”, лічаць у Міністэрстве юстыцыі Беларусі, дзе не спадабаўся артыкул лідэра Аб’яднанай грамадзянскай партыі (АГП) у “Народнай волі” за 4 сакавіка пад загалоўкам “Інквізыцыя”. У ёй палітык распавядае пра сваю спрэчку з КДБ Беларусі адносна незаконнага, на яго думку, вынясеньня афіцыйнага папярэджаньня.

5 лістапада 2002 году А.Лябедзьку было вынесенае афіцыйнае пісьмовае папярэжданьне КДБ, нагадвае БелаПАН. У дакумэнце адзначалася, што А.Лябедзька меў канфідэнцыйныя кантакты “з замежнымі грамадзянамі, якія зьяўляюцца выведнікамі ці падазраванымі ў датычнасьці да замежных спэцслужбаў”, а таксама гаварылася пра наяўнасьць у КДБ дадзеных аб яго “фінансавай залежнасьці ад заходніх фундатараў”. Гэта, як сьцьвярджалася ў дакумэнце, сьведчыць пра магчымыя спробы ўцягваньня А.Лябедзькі ў супрацьпраўную дзейнасьць і надалей магло прывесьці да здрады дзяржаве. Нязгодны з папярэджаньнем КДБ, лідэр АГП зьвярнуўся ў суд Цэнтральнага раёну сталіцы з зыскам аб прызнаньні яго неправамоцным. Аднак суд зыск не задаволіў.

У артыкуле “Інквізыцыя” А.Лябедзька заяўляе аб неабгрунтаванасьці прэтэнзіяў з боку Камітэту дзяржаўнай бясьпекі і робіць выснову, што ў сучаснай Беларусі адным з асноўных кірункаў дзейнасьці КДБ зьяўляецца “палітычны зыск” і “барацьба з іншадумствам”. У публікацыі таксама гаворыцца, што беларускія спэцслужбы сталі “часткай неразумнай, незбалянсаванай, пачварнай сыстэмы”, яшчэ адным складнікам якой зьяўляюцца і суды. У паведамленьні Мінюста адзначаецца, што ў сваім артыкуле А.Лябедзька дапусьціў “грубыя выпады ў адрас суда Цэнтральнага раёну Менску, увогуле судовай улады, а таксама ўпаўнаважаных дзяржаўных органаў, якія мусяць абараняць дзяржаўны лад, сувэрэнітэт і бясьпеку нашай краіны”.
Мінюст ацэньвае дзеяньні лідэра АГП як ціск на суд “ з мэтай перашкаджаць поўнаму і ўсебаковаму разгляду канкрэтнай справы”. “Лічым таксама, што ў такіх дзеяньнях праглядаецца распаўсюд абразьлівых меркаваньняў з выкарыстаньнем сродкаў масавай інфармацыі адносна адказных асобаў дзяржаўных органаў, якія забясьпечваюць нацыянальную бясьпеку Рэспублікі Беларусь”, -- гаворыцца ў афіцыйным паведамленьні Мінюста.

Мінюст нагадвае таксама, што ўжо неаднаразова выносіў папярэджаньні АГП за парушэньні заканадаўства, “у тым ліку і зьвязаныя зь дзеяньнямі яе лідэра, які, у адпаведнасьці з статутам партыі, прадстаўляе яе інтарэсы і фармуе імідж”. Мінюст папярэджвае, што “ня мае права дазваляць ігнараваць законы Рэспублікі Беларусь, міжнародныя прававыя нормы і дэстабілізаваць абстаноўку ў краіне”.

Сам А.Лябедзька лічыць, што Мінюст “у чарговы раз узяўся не за сваю справу”. “У артыкуле “Інквізыцыя” я выступаў як прыватная асоба, як грамадзянін Лябедзька, а не як лідэр партыі. Прычым тут АГП? Гэта ж абсурд”, -- сказаў ён у інтэрвію БелаПАН. На думку палітыка, Мінюст “выканаў загад, які паступіў або з Адміністрацыі прэзыдэнта, або з КДБ”.