Страйкам прадпрымальнікаў паведаміў ураду і Лукашэнку пра страйк 12 сакавіка :: Хартыя'97 :: Навiны

Страйкамаўскі камітэт прадпрымальнікаў накіраваў ураду і Аляксандру Лукашэнку паведамленьне аб забастоўцы 12 сакавіка. Прадпрымальнікі таксама паведамляюць, што плянуюць далучыцца да маршу “За лепшае жыцьцё!”, які заплянаваны на 12 сакавіка.

Як паведаміў БелаПАН старшыня страйкаму Валеры Леванеўскі, у паведамленьні ўтрымліваюцца патрабаваньні да кіраўніцтва краіны. Сярод іх – адмена абавязковай наяўнасьці касавых апаратаў і адкрыцьця разьліковага рахунку для асобаў, якія сплочваюць адзіны падатак, а таксама перагляд сьцьверджаньня аб сацыяльным страхаваньні для прадпрымальнікаў. У сваю чаргу, арганізатары акцыі мяркуюць тры варыянты сацстрахаваньня: добраахвотнае страхаваньне, спагнаньне выплаты ў пэнсійны фонд і соцстрах з адзінага падатку ці ўвядзеньне накапляльнай сыстэмы ў эўра. Акрамя таго, прадпрымальнікі патрабуюць адмяніць дэкрэты прэзыдэнта №3,№4 і ўказ №42 ад 27 студзеня 2003 году.

Паводле Валеры Леванеўскага, калі патрабаваньні, выкладзеныя ў паведамленьні, ня будуць выконвацца, страйк 12 сакавіка стане першым у шэрагу масавых акцыяў пратэсту, мітынгаў і пікетаў.

Пры гэтым ён падкрэсьліў, што арганізатарамі стайку зьяўляюцца аб’яднаныя сілы грамадзкага аб’яднаньня “Пэрспэктыва”, грамадзкае аб’яднаньне “Прыватная ўласнасьць” і страйкам прадпрымальнікаў.

Леванеўскі мяркуе, што страйк 12 сакавіка “ахопіць каля 40 адсоткаў тэрыторыі Беларусі”.