Гарадзенскія прадпрымальнікі патрабуюць ад “дэпутатаў” адхіліць дэкрэт №4 :: Хартыя'97 :: Навiны

10 сакавіка індывідуальныя прадпрымальнікі Горадні адправілі ліст абраным ад вобласьці 13 дэпутатам “палаты прадстаўнікоў” з заклікам адхіліць дэкрэт №4 “Аб адзіным падатку з індывідуальных прадпрымальнікаў і іншых фізычных асобаў і аб некаторых мерах па ўрэгуляваньні прадпрымальніцкай дзейнасьці”.

Тэкст ліста падрыхтаваны грамадзкай арганізацыяй “Клюб прадпрымальнікаў” і зацьверджаны агульным сходам прадстаўнікоў гарадзенскіх рынкаў. “Захаваньне патрабаваньняў дэкрэту садзейнічае скарачэньню працоўных месцаў, што, у сваю чаргу, паўплывае на дабрабыт грамадзянаў і увогуле ўсёй дзяржавы”, -- гаворыцца ў лісьце. Дэкрэт мае фіскальны і дыскрымінацыйны характар, сьцвярджаюць аўтары пасланьня, бо плата прадпрымальніка за гандлёвае месца павялічваецца ў сярэднем у 1,7 разоў, агульная падаткавая нагрузка вырастае на 15,5 адсоткі. Дзеяньне нормы, якая абмяжоўвае колькасьць наёмных работнікаў трыма адзінкамі, прывядзе да значнага скарачэньня колькасьці індывідуальных прадпрымальнікаў і страты сродкаў, укладзеных у ліцэнзіі, сэртыфікаты, дазволы, сяброўства ў асацыяцыях.

“Ад "дэпутатаў", вядома, мала што залежыць, -- заявіў БелапАН кіраўнік юрыдычнай службы “Клюбу прадпрымальнікаў” Валянцін Бранцэвіч. – Але мы спадзяемся, што “дэпутаты” адхіляць дэкрэт і ў гэтай рэдакцыі ён ня будзе дзейнічаць”.

Галасаваньне “дэпутатаў” па дэкрэту №4, які набраў моц 1 сакавіка, пройдзе ў красавіку. Паводле В.Бранцэвіча, каля 40 “дэпутатаў” гатовыя прагаласаваць супраць гэтага дакумэнту.