Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Журналіст Мікалай Маркевіч уладкаваўся на працу экспэдытарам 11:10, 11/03/2003
Пасьля вяртаньня ў Горадню з папраўчай установы адкрытага тыпу пры Асіповіцкім РАУС (Магілёўская вобласьць) асуджаны журналіст Мікалай Маркевіч уладкаваўся на працу экспэдытарам. Рэдактар закрытай судом газэты “Пагоня” пачаў працаваць у фірме “Верасень” і будзе займацца экспэдыцыяй грузаў па Беларусі. Такая праца, паводле М.Маркевіча, дазволіць яму “ў поўнай меры займацца журналісцкай і грамадзкай дзейнасьцю”.
“Я спадзяюся, што міліцыя пойдзе насустрач і, нягледзячы на мой нявыязны статус, дазволіць зарабляць грошы менавіта такім чынам”, -- сказаў М.Маркевіч у інтэрвію БелаПАН. Паводле рашэньня суда, які замяніў “хімію” на больш мяккае пакараньне, зараз асуджаны журналіст павінен сплочваць 15 адсоткаў свайго заробку.
Як патрабуе закон, М.Маркевіч стаў на ўлік у гарадзенскую крымінальна-папраўчую інспэкцыю. У бліжэйшы час ён мусіць стаць на відэаўлік, улік у крымінальным вышуку. А таксама зьявіцца да ўчастковага інспэктара, і раз на месяц яго павінен наведваць міліцыянт.
