Яшчэ чатыры банкі пазбаўленыя ліцэнзіі на прыцягненьне ўкладаньняў :: Хартыя'97 :: Навiны

У адпаведнасьці з артыкулам 98 Банкаўскага кодэксу Рэспублікі Беларусь Кіраваньне інфармацыі Нацбанку паведамляе, што Кіраўніцтва Нацыянальнага банку Рэспублікі Беларусь 12 сакавіка 2003 году пастанавіла адазваць з 20 сакавіка 2003 году ліцэнзіі на прыцягненьне ва ўкладаньні сродкаў фізычных асобаў ААТ “Беларускі народны банк”, ААТ “Беларускі Індустрыяльны банк”, ЗАТ “Абсалютбанк”, ЗАТ “РРБ-Банк”.

Гэтае рашэньне прынятае ў адпаведнасьці з пунктамі 14 і 22 Правілаў прымяненьня Нацыянальным банкам мераў узьдзеяньня да банкаў і нябанкаўскіх крэдытна-фінансавых установаў ад 25.01.2001 № 3. Прычынаю таму стала невыкананьне пералічанымі банкамі эканамічнага нарматыву ўласных сродкаў (капіталу), вызначанага пунктам 17 Правілаў регуляваньня дзейнасьці банкаў і нябанкаўскіх крэдытна-фінансавых арганізацыяў ад 28.06.2001 № 173, і прадпісаньняў Нацыянальнага банку. Аналіз праведзены Нацбанкам паказаў, што вышэйназваныя банкі ня могуць давесьці ўласны капітал да памераў, вызначаных для дзейных банкаў, якія маюць ліцэнзію на прыцягненьне ва ўкладаньні сродкаў фізычных асобаў, ня менш за 10 мільёнаў эўра.

На дадзены момант памер укладаньняў фізычных асобаў у пералічаных банках нязначны. Пасьля адкліканьня ліцэнзіі банкі павінны вярнуць сродкі ўкладальнікаў, якія разьмяшчаліся ў іх, бо будзе лічыцца, што тэрміны выкананьня дэпазытных дамоваў наступілі.