Беларуская інтэлігенцыя дамагаецца вызваленьня вязняў сумленьня :: Хартыя'97 :: Навiны

Аргкамітэт Усебеларускага сходу інтэлігенцыі выступіў са зваротам да старшыні Менскага гарсуду і кіраўніцтва пракуратуры з заклікам вызваліць зьняволеных арганізатараў Народнага маршу “За лепшае жыцьцё!” Андрэя Саньнікава, Людмілу Гразнову, Зьмітра Бандарэнку і Леаніда Малахава. Усе чацьвёра арыштаваных ёсьць дэлегатамі сходу інтэлігенцыі, і аргакамітэт лічыць, што яны павінны ўзяць удзел у гэтым мерапрыемстве.

З ініцыятывай вызваленьня Андрэя Саньнікава, Людмілы Гразновай, Зьмітра Бандарэнкі й Леаніда Малахава, пакараных 15-сутачным арыштам арганізатараў маршу “За лепшае жыцьцё!”, выступілі сустаршыні аргкамітэту сходу інтэлігенцыі Ўладзімер Колас, Аляксей Марачкін і Аляксей Кароль. Вось што сказаў спадар Колас:

-- Мы ад імя аргкамітэту накіравалі лісты пракурору Менску спадару Куліку і старшыні гарсуду спадару Ардзяку. Мы паведамляем, што Саньнікаў, Гразнова, Бандарэнка і Малахаў ёсьць дэлегатамі Ўсебеларускага сходу інтэлігенцыі. Яны асуджаныя як арганізатары маршу “За лепшае жыцьцё!”. А паколькі марш прайшоў мірна, без парушэньня грамадзкага парадку, то яны асуджаныя несправядліва. Мы просім іх вызваліць, каб яны мелі магчымасьць удзельнічаць у нашым сходзе.

Сустаршыні аргкамітэту спадзяюцца, што старшыня суду і пракурор прыслухаюцца да іхнай просьбы. Тым больш, што падобны прэцэдэнт ужо быў. Некалькі гадоў таму са спэцпрыёмніка быў вызвалены Лявон Баршчэўскі. Тады ўлады далі яму магчымасьць паўдзельнічаць у зьезьдзе БНФ.

Нагадаем, што Ўсебеларускі сход інтэлігенцыі пачнецца 16 сакавіка ў Менску, у палацы культуры “Сукно”. Дэлегаты (а гэта прыкладна 800 чалавек з усіх рэгіёнаў) зьбіраюцца абмеркаваць палітычную, эканамічную і культурную сытуацыю ў Беларусі. У падрыхтаваным праекце рэзалюцыі сходу сытуацыя ў Беларусі вызначаная як сыстэмны крызыс.