Мікалай Маркевіч стаў ляўрэатам прэміі “Маладая прэса Ўсходняе Эўропы” :: Хартыя'97 :: Навiны

Рэдактар закрытай уладамі гарадзенскай газэты “Пагоня” Мікалай Маркевіч і газэта “Белорусский рынок” сталі ляўрэатамі прэміі Герда Буцэрыюса “Маладая прэса Ўсходняе Эўропы” 2003 году нямецкага фонду “Цайт-Штыфтунг”. Прэмія ў гонар заснавальніка фонду і былога рэдактара нямецкай газэты “Цайт” Герда Буцэрыюса прысуджаецца фондам з 1999 году. Ён уганароўвае імі ўсходнеэўрапейскія друкаваныя сродкі масавай інфармацыі і асобных журналістаў, якіх адрозьніваюць прафэсіяналізм і грамадзянская мужнасьць.

Камэнтуючы БелаПАН гэтую падзею, галоўны рэдактар газэты “Белорусский рынок” Вячаслаў Хадасоўскі адзначыў, што “БР” – першая недзяржаўная беларуская газэта, яна была зарэгістраваная ў 1990 годзе. “Увесь гэты час мы мянялі творчую канцэпцыю свайго выданьня, якая абапіраецца перш за ўсё на аналітыку ў галіне актуальных прблемаў грамадзтва. Нягледзячы ні на якую кан’юнктуру, мы імкнуліся трымацца гэтае лініі. Прынцып нашай газэты – не ісьці за чытачом, а весьці яго за сабой, прапаноўваць ідэі, якія, магчыма, сёньня яшчэ не ўспрымаюцца большасьцю насельніцтва, але над якімі грамадзтва павінна задумвацца. Мы лічым, што гэтая прэмія -- пацьверджаньне слушнасьці нашага курса. Такая высокая ацэнка з боку фонду ў наш нялёккі час будзе маральным стымулам для калектыва і дапаможа вырашаць новыя задачы”, -- сказаў В.Хадасоўскі.

Гэтая ўзнагарода, лічыць М.Маркевіч, -- “знак салідарнасьці нямецкіх калег зь беларускімі журналістамі, гэта падтрымка рэпрэсіўнага беларускімі ўладамі права на свабоду слова”. “Мне падаецца, што гэта вельмі важны сігнал ня толькі мне і журналістам незалежных СМІ, але і маім судзьдзям, пракурорам, турэмшчыкам, -- сказаў М.Маркевіч. – Гэта недвухсэнсоўны знак асуджэньня іх дзеяньняў адносна нас, журналістаў. У чарговы раз нашым уладам даюць зразумець, што іх намаганьні накіраваныя не на добрыя справы, што суды над журналістамі не ўхваляе ўвесь цывілізаваны сьвет”. М.Маркевіч паведаміў, што ў бліжэйшы час плянуе пачаць выданьне новае газэты, на якую і пойдзе прэмія. Ён упэўнены, што газэта будзе зарэгістраваная і будзе пасьпяхова існаваць “хаця б таму, што ніша “Пагоні” не занятая ў беларускай інфармацыйнай прасторы”.