Лідэры прадпрымальніцкага руху выступілі ў падтрымку арыштаваных арганізатараў Народнага маршу :: Хартыя'97 :: Навiны

Лідэры прадпрымальніцкіх структураў, якія аб’ядналіся вакол ідэі правядзеньня Народнага маршу “За лепшае жыцьцё!”, старшыня Страйкаму прадпрымальнікаў Беларусі Валеры Леванеўскі і старшыня рэспубліканскага грамадзкага аб’яднаньня Анатоль Шумчанка выступілі ў падтрымку свайго калегі, сустаршыні РГА “Прыватная ўласнасьць” Леаніда Малахава і іншых арганізатараў маршу, якія былі асуджаныя да арышыту тэрмінам на 15 сутак.

Заява лідэраў прадпрымальніцкага руху Рэспублікі Беларусь
Больш за сто тысячаў прадпрымальнікаў у трыццаці гарадох Беларусі прынялі ўдзел у страйку 12 сакавіка. Акцыі пад агульным лёзунгам “За лепшае жыцьцё!” прайшлі ў Магілёве, Гомлі, Барысаве. 12 сакавіка ў Менску прайшла дэманстрацыя пад сацыяльнымі лёзунгамі, у якой удзел прынялі больш за пяць тысячаў чалавек.

Упершыню ў найновай гісторыі Беларусі прадстаўнікі розных слаёў насельніцтва выступілі адзіным фронтам з патрабаваньнем лепшага жыцьця. У акцыі прынялі ўдзел прадпрымальнікі і рабочыя, студэнты і пэнсіянэры.

Менавіта гэта і спужала беларускія ўлады. Спужала тое, што мы разам выйшлі на плошчу Якуба Коласа, спужала тое, што мы разам выступалі за лепшае жыцьцё.

Беларускія ўлады зразумелі, што ўсе іх спробы заціснуць прадпрымальнікаў праваліліся. 12 сакавіка стаў днём аб’яднаньня прадпрымальнікаў. Аргкамітэт па стварэньні РГА “Пэрспэктыва”, Страйкам прадпрымальнікаў, РГА “Прыватная ўласнасьць” аб’ядналі свае намаганьні, дзякуючы чаму 12 сакавіка прайшоў найбольш масавы за апошні час страйк прадпрымальнікаў і Народны марш “За лепшае жыцьцё!” у Менску.

Акцыя не абыйшлася без стратаў. Тры арганізатары акцыі – Андрэй Саньнікаў, Зьміцер Бандарэнка, Людміла Гразнова, а таксама адзін з арганізатараў страйку прадпрымальнікаў, сустаршыня РГА “Прыватная ўласнасьць” Леанід Малахаў былі арыштаваныя і асуджаныя да 15 сутак адміністратыўнага арышту.

Акцыя мела выключна мірны характар, і не было ніякіх прычынаў арыштоўваць ейных арганізатараў. Адзіная прычына строгіх прысудаў – улада прызнае нашую сілу. І яна баіцца гэтай сілы. Арганізаванай сілы, як паказала першая сумесная акцыя.

Народны марш 12 сакавіка – першая акцыя, праведзеная намаганьнямі прадпрымальнікаў і рабочых, студэнтаў і пэнсіянэраў. Першы сумесны крок да лепшага жыцьця.

Мэта такіх прысудаў – застрашыць прадпрымальнікаў, спыніць барацьбу за лепшае жыцьцё. Але нас ужо позна страшыць і нельга спыніць. Калі нашыя патрабаваньні ня будуць задаволеныя, барацьба працягнецца.

“Дзьве гадзіны волі, якія былі ў прадпрымальнікаў на плошчы Якуба Коласа, былі вартыя 15 сутак. Я ўпэўнены -- хутка гэтыя дзьве гадзіны стануць для ўсіх нас цэлым новым жыцьцём у свабодзе”, -- сказаў наш калега Леанід Малахаў пасьля абвяшчэньня прысуду.

І разам мы дасягнем, каб наша свабода цягнулася ўсё жыцьцё!

Старшыня Страйкаму Прадпрымальнікаў Беларусі
Валеры Леванеўскі

Каардынатар аргкамітэту па стварэньні РГА “Пэрспэктыва”
Анатоль Шумчанка