Украінская салідарнасьць у барацьбе зь беларускай дыктатурай :: Хартыя'97 :: Навiны

Прадстаўнікі ўкраінскай дэмакратычнай грамадзкасьці наладзілі акцыю салідарнасьці зь беларускім народам. Украінскі інтэрнэт-рэсурс “Майдан-інформ” атрымаў ліст, аўтары якога заклікаюць украінскую дыяспару Злучаных Штатаў Амэрыкі пасадзейнічаць прыняцьцю Кангрэсам ЗША Акта аб дэмакратыі ў Беларусі. Нагадаем, што кангрэсмэн Крыстафэр Сьміт ад штата Нью-Джэрсі прапанаваў на разгляд Канрэсу ЗША Біль за нумарам 854 “Акт аб дэмакратыі ў Беларусі - 2003”, мэтай якога зьяўляецца разьвіцьцё дэмакратыі, правоў чалавека і вяршынства закону ў Беларусі. Біль таксама прадугледжвае прыняцьце санкцыяў супраць рэжыму Аляксандра Лукашэнкі. “Паважаныя ўкраінскія сябры, -- гаворыцца ў лісьце, -- для канчатковага Акта аб дэмакратыі ў Беларусі патрабуецца вялікая колькасьць дадатковых галасоў. Мы зьвяртаемся да Вас з просьбай адправіць ліст Вашаму кангрэсмэну, у якім бы Вы заклікалі яго стаць суаўтарам дакумэнту”.

Ніжэй мы падаем прыклад тэксту ліста, які прапануецца адпраўляць амрыканскім кангрэсмэнам:

«Паважаны сп …,

Два тыдні таму кангрэсмэн Крыстафэр Сьміт зь Нью-Джэрсі прапанаваў на разгляд Кангрэсу ЗША Біль за нумарам 854 “Акт аб дэмакратыі ў Беларусі - 2003”, мэтай якога зьяўляецца разьвіцьцё дэмакратыі, правоў чалавека і вяршынства закону ў Беларусі. Ён таксама прадугледжвае прыняцьце санкцыяў супраць рэжыму Аляксандра Лукашэнкі, якога заходняя прэса нярэдка называе “апошнім дыктатарам Эўропы”. Яго рэжым уціскае незалежную прэсу, татальна кантралюе радыё і тэлевізію, уціскае журналістаў, а таксама розныя няўрадавыя арганізацыі і дэмакратычную апазыцыю.

Існуюць сьведчаньні таго, што рэжым нясе адказнасьць за зьнікненьне палітычных апанентаў і фальсыфікацыю вынікаў выбараў. Нядаўна ён прыняў самы рэпрэсіўны і дыскрымінацыйны закон аб рэлігіях у Эўропе.

Што яшчэ жахліва, рэжым зьяўляецца таксама адным з асноўных пастаўшчыкоў узбраеньня дзяржавам-“ізгоям” і нядаўна правёў падрыхтоўку ірацкіх афіцэраў СПА.

Спадзяюся, вы падтрымаеце “Акт аб дэмакратыі ў Беларусі - 2003” і станеце яго суаўтарам. Беларусь заслугоўвае лепшай, дэмакратычнай будучыні.
З павагаю,
Ваш выбарнік»

Адправіць дадзены ліст можна з спасылкі:

http://maidan.org.ua/n/news/1047499409