Заява руху ЗУБР :: Хартыя'97 :: Навiны

12 сакавіка 2003 году Аляксандар Лукашэнка прадэманстраваў свой страх перад мірным пратэстам беларускага народа, бясьсільле перад асабістай мужнасьцю людзей. Даведзеныя да галечы і абрабаваныя рэжымам, яны выйшлі на Народны марш “За лепшае жыцьцё!” пад сацыяльнымі лёзунгамі і патрабавалі адстаўкі Лукашэнкі і яго ўраду. Больш за 100.000 індывідуальных прадпрымальнікаў у дзясятках гарадоў падтрымалі акцыю ў Менску агульнанацыянальным страйкам.

На ўціск мірнай дэманстрацыі рэжым кінуў атрады міліцыі і ўнутраных войскаў. За патрабаваньні зьмяншэньня камунальных тарыфаў, падвышэньня заробкаў, пэнсіяў і стыпэндыяў, паляпшэньня ўмоваў для прадпрымальніцкай дзейнасьці арыштаваныя і зьняволеныя арганізатары Маршу – вядомыя і паважаныя ў краіне людзі – Андрэй Саньнікаў, Людміла Гразнова, Зьміцер Бандарэнка і Леанід Малахаў.

Рух ЗУБР нагадвае супрацоўнікам міліцыі, КДБ і пракуратуры, судзьдзям аб адказнасьці за парушэньне Канстытуцыі і законаў, уціску правоў і свабодаў грамадзянаў, вынясеньне неправамерных прысудаў, злачынствы супраць чалавецтва.

На нашых вачох рухнулі ўсе дыктатуры, якія існавалі ў Эўропе, грамадзяне гэтых краінаў асудзілі тых, хто зьневажаў закон у гады дыктатуры. Многія паліцэйскія і судзьдзі былой Югаславіі панесьлі пакараньне за злачынствы супраць уласнага народа, зьдзейсьненыя ў гады кіраваньня Слабадана Мілошавіча. Задумайцеся над гэтым! З кім вы? З народам ці апошнім дыктатарам Эўропы?

Рух ЗУБР патрабуе неадкладна вызваліць арганізатараў мірнай акцыі пратэсту і выканаць патрабаваньні, выкладзеныя ў рэзалюцыі, прынятай удзельнікамі Народнага маршу “За лепшае жыцьцё!”, прыцягнуць да адказнасьці службовых асобаў, якія парушылі Канстытуцыю Беларусі, адказных за парушэньне права грамадзянаў на свабоду сходаў, вулічных шэсьцяў і дэманстрацыяў, а таксама судзьдзяў, якія вынесьлі злачынныя прысуды арганізатарам Маршу.