Заява «Зьвязу беларусаў замежжа» :: Хартыя'97 :: Навiны

12 сакавіка "Зьвяз беларусаў замежжа" правёў акцыю ў падтрымку беларускага Маршу, які праходзіў пад лёзунгам "За лепшае жыцьцё!". Сябры зьвязу абышлі праскія офісы міжнародных арганізацыяў, каб распаўсюдзіць адпаведную заяву. “Зьвяз беларусаў замежжа” салідарны з дэмакратычнымі сіламі на Радзіме і выказвае поўную падтрымку людзям, якія працягваюць змагацца за лепшую будучыню для Беларусі. Прапануем вашай увазе тэкст заявы, які распасюджваўся ў міжнародных офісах Прагі:

“12 сакавіка 2003 году апазыцыйныя сілы Беларусі праводзяць акцыю пад лёзунгам “За лепшае жыцьцё!”. Лёзунг накіраваны супраць рэжыму Аляксандра Лукашэнкі, які пасьля 1994 году зацягнуў Беларусь у балота безпрацоўя, галечы, нацыянальнага прыгнёту і зьнявагі. Сярэдні заробак на Беларусі - $70. Гэтага не хапае нават для таго, каб мець на стале мяса кожны дзень. Нават гэты мізер не выплочваецца месяцамі, і людзі літаральна галадаюць і замярзаюць у сваіх кватэрах. Велізарныя сродкі выкідваюцца на грандыёзныя сьвяткаваньні, арганізаваныя дзяржавай для ўслаўленьня “Усходне-славянскага саюзу”, і на ўнутраныя войскі, у той час як звычайныя людзі ледзьве-ледзьве забясьпечваюць свае асноўныя патрэбы: ежу ды вопратку. Прэзыдэнт і яго атачэньне паводзяць сябе як захопнікі на акупаванай тэрыторыі – карупцыя, з бласлаўленьня вышэйшых уладаў, паралізавала дзяржаўны апарат на ўсіх узроўнях. Людзей трымаюць пад кантролем пры дапамозе грубай сілы і шантажу: іншадумцы, як звычайныя людзі, так і вядомыя палітыкі і журналісты падвяргаюцца запалохваньню, зьбіцьцю, зьняволеньню і забойствам. Рэлігійная свабода, чым заўсёды была вядомая Беларусь, зьнішчана: прэзыдэнцкім указам праваслаўная царква заняла становішча манапольнай дзяржаўнай рэлігіі. Сотні тысячаў каталікоў, пратэстантаў ды мусульманаў былі фактычна абвешчаныя сектай, без права свабодна вызнаваць сваю рэлігію. Беларуская мова метадычна выцясьняецца з афіцыйнага справаводзтва. Штогод зачыняюцца дзясяткі беларускіх школаў, беларускія пісьменьнікі, сьпевакі і настаўнікі падвяргаюцца ўціску і вымушаныя эміграваць.

Мы, беларусы, якія жывуць за мяжой, дэкляруем сваю салідарнасьць з нашым народам, які працягвае змагацца супраць гэтых нечалавечых умоваў на Радзіме. Колькі ўжо можна гэта трываць?!