Беларуская інтэлігенцыя сказала «не» дзейнаму рэжыму :: Хартыя'97 :: Навiны

Усебеларускі сход беларускай інтэлігенцыі прайшоў 16 сакавіка ў Менску ў Палацы культуры “Сукно”. Дэлегаты (а гэта прыкладна 800 чалавек з усіх рэгіёнаў) сабраліся абмеркаваць палітычную, эканамічную і культурную сытуацыю ў Беларусі. У форуме прынялі ўдзел такія вядомыя прадстаўнікі беларускай інтэлігенцыі як Ніл Гілевіч, Генадзь Бураўкін, Анатоль Вярцінскі, Сяргей Законьнікаў, Алесь Марачкін, Зінаіда Бандарэнка, Уладзімер Арлоў, Уладзімер Колас, Лявон Вольскі і многія іншыя.

У рэзалюцыі сходу сытуацыя ў Беларусі вызначаная як сыстэмны крызыс. “Наша родная Беларусь перажывае глубокі сыстэмны крызыс. Стратэгічны курс уладаў на камандную сыстэму кіраваньня і ўціск дэмакратычных свабодаў прывёў краіну да міжнароднай ізаляцыі і паставіў яе эканоміку на мяжу краху”, -- канстатавалі ўдзельнікі зьезду. У гэтай сытуацыі, на іх думку, “шмат залежыць ад інтэлігенцыі, ад яе мужнасьці і прынцыповасьці”. Аднак удзельнікі сходу прызналі, што сёньня многія прадстаўнікі беларускай інтэлігенцыі занялі прыстасавальніцкую пазыцыю, трываюць хлусьню афіцыйных сродкаў масавай інфармацыі, злачынныя маніпуляцыі на выбарах, маўчаць, калі перасьледуюць калег і суайчыньнікаў.

Удзельнікі Ўсебеларускага сходу інтэлігенцыі катэгарычна выступілі супраць любых спробаў ліквідацыі незалежнасьці і сувэрэнітэту Беларусі. Яны прапанавалі Аляксандру Лукашэнку зьвярнуцца па досьвед дэмакратычных пераўтварэньняў у цывілізаваных краінах, і пачаць канструктыўны дыялёг з прадстаўнікамі ўсіх палітычных плыняў. У якасьці першага кроку да такога дыялёгу Лукашэнку прапануецца неадкладна вызваліць зьняволеных журналістаў, а таксама правесьці расьсьледаваньне справаў зьніклых у Беларусі вядомых людзей.

Акрамя таго, удзельнікі Ўсебеларускага сходу інтэлігенцыі катэгарычна выступілі супраць падаўжэньня прэзыдэнцкіх паўнамоцтваў Аляксандра Лукашэнкі.

Прадстаўнікі інтэлігенцыі, якія прынялі ўдзел у сходзе, заклікалі прадстаўнікоў усіх інтэлектуальных прафэсіяў, усіх грамадзянаў Беларусі праявіць цьвёрдасьць, грамадзянскую сьвядомасьць і волю, кансалідаваць намаганьні грамадзтва па выхаду з крызыснай сытуацыі.