Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Ваенныя дзеяньні ЗША супраць Іраку прывядуць да расколу сусьветнай супольнасьці і справакуюць новыя ваенныя канфлікты. Такую думку ў інтэрвію “Интерфаксу” ў аўторак выказаў кіраўнік камісіі па міжнародных справах і нацыянальнай бясьпецы верхняй палаты беларускага “парлямэнту” Мікалай Чаргінец. “Дзеяньні Буша нагадваюць дзеяньні слана ў краме посуду: ён гатовы разьнесьці ўсю краму толькі таму, што яму не падабаецца як сябе паводзяць іншыя”, -- заявіў “парлямэнтар”.
Пры гэтым ён адзначыў, што зброя, нядаўна выпрабаваная Амэрыкай, прывядзе да страшных наступстваў і разбурэньняў, вялікай колькасьці ахвяраў сярод мірнага насельніцтва. “Калі Штаты нанясуць удар па Іраку – гэта будзе самым страшным злачынствам супраць чалавецтва, больш цяжкім, чым тыя, у якіх ЗША абвінавачваюць Садама Хусэйна”, -- сказаў кіраўнік камісіі. Суразмоўцу агенцтва таксама не зьдзіўляе, што Старая Эўропа не падтрымлівае Амэрыку. “Эўропа – утвораная цывілізаваная супольнасьць, якую дзьве вайны навучылі жыць у міры”, -- адзначыў М.Чаргінец. Акрамя таго, на яго думку, дзеяньні ЗША прывядуць да буйнейшага развалу ў ААН і да канфлікту ў Радзе Бясьпекі.
, iнформэр
