Вынікі агульнарэспубліканскага страйку прадпрымальнікаў 12 сакавіка :: Хартыя'97 :: Навiны

Прадстаўнікі дробнага бізнэсу Беларусі актыўна падтрымалі агульнарэспубліканскую акцыю пратэсту 12 сакавіка. У агуле, можна канстатаваць, што большая частка прадпрымальнікаў Беларусі ўсьведамляе ўсю негатыўнасьць сытуацыі, якая складваецца ў галіне дробнага бізнэсу, і гатовая да самых сур’ёзных мераў у барацьбе за свае правы.

МЕНСК – у сталіцы спыніліся буйнейшыя рынкі “Дынама”, “Ждановічы”, “Чэрвенскі”, “Трактар”, не працавалі цэнтры “Аквабэл”, “Купалаўскі”, “Алімп”, “Зеркало”, “Паркінг”, выстава-продаж у Палацы спорту.

САЛІГОРСК — два асноўныя рынкі не працавалі цалкам, не працаваў шэраг шапікаў. Прайшоў сход адміністрацыі з удзелам прадпрымальнікаў – абмяркоўваўся Дэкрэт №4, але пасьля заявы пра тое, што прадпрымальнікам давядзецца працаваць у адпаведнасьці з Дэкрэтам №4, прадстаўнікі дробнага бізнэсу дэманстратыўна пакінулі паседжаньне.

МОЗЫР — рынкі не працавалі цалкам. Акцыю прадпрымальнікаў падтрымалі кіроўцы маршрутных таксовак. 12 сакавіка цэлы дзень праезд у “маршрутках” каштаваў 200 рублёў замест звычайных 500.

ВІЦЕБСК — страйкавала большасьць прадпрымальнікаў. Полацкі рынак -- 100%; Смаленскі рынак — 95%; Аўтарынак — 75%; Паўднёвы рынак (невялікі па колькасьці) — 40%.

Прайшоў круглы стол з удзелам мясцовай адміністрацыі. Прадпрымальнікам паабяцалі пайсьці на некаторыя саступкі, у прыватнасьці, не караць за адсутнасьць накладных (перасоўваньне тавару з складу на рынак і наадварот), было дадзена абяцаньне не перасоўваць гандлёвыя намёты. Прадпрымальнікі спрабавалі пераканаць прадстаўнікоў уладаў у тым, што працаваць па новым Дэкрэце №4 немагчыма. Чыноўнікі пагадзіліся з тым, што дэкрэт сапраўды недапрацаваны, тым не менш, заявілі, што працаваць па ім ўсё ж такі давядзецца.

СЬВЕТЛАГОРСК — буйнейшы рынак страйкаваў цалкам, не падтрымаў акцыю толькі міні-рынак (50 чалавек). А 14.00 адбыўся сход з удзелам прадпрымальнікаў і прадстаўнікоў мясцовай адміністрацыі, прысутнічалі прадстаўнікі падаткавых органаў, адміністрацыі раёну, фонду сацыяльнай абароны.

Прадпрымальнікі паставілі пытаньне аб Дэкреце № 4 і заявілі аб тым, што ў выпадку ўвядзеньня ў дзеяньне дадзенага Дэкрэту, яны пачынаюць страйк з 1 красавіка.

ПЕТРЫКАЎ — рынак страйкаваў цалкам, за выключэньнем некаторых намётаў. У райвыканкам была перададзеная пэтыцыя прадпрымальнікаў з патрабаваньнем адмяніць Дэкрэт №4;

БАРАНАВІЧЫ — страйкавала 70-80% прадпрымальнікаў на ўсіх рынках гораду, працавалі прадаўцы харчоў, якія традыцыйна не падтрымліваюць аніякія акцыі пратэсту.
ПОЛАЦАК – страйкавалі ўсе прадпрымальнікі гораду

НАВАПОЛАЦАК — страйкавалі ўсе прадпрымальнікі гораду.

ПІНСК — цалкам страйкавалі два буйнейшыя рынкі. Да акцыі далучыліся таксісты.

МАЛАДЭЧНА — на 100% рынкі не працавалі, таксама страйкавала сетка шапікаў;

ГОМЕЛЬ — а 17.00 адбыўся несанкцыянаваны мітынг. Прадпрымальнікі і прадстаўнікі руху “ЗУБР” сабраліся на плошчы Паўстаньня а 18.00. У акцыі ўдзел прымала некалькі дзясяткаў чалавек.

БАРЫСАЎ — працавала ня больш за 5% прадпрымальнікаў: буйнейшы рынак — страйкаваў на 100%, рынак «Спатканьне» — страйкаваў на 95%, рынак «Стары горад» — з 300 чалавек на працу выйшла прыкладна 10 чалавек, Новабарысаўскі рынак — выйшлі толькі некоторыя прадаўцы харчоў — прыкладна 5% ад агульнай колькасьці, Аўтарынак — працавала прыкладна 5-10 %.

А 17.00 на цэнтральнай плошчы прайшоў несанкцыянаваны мітынг у падтрымку страйку 12 сакавіка і маршу «За лепшае жыцьцё!». У акцыі ўдзел прынялі каля 200 чалавек — прадпрымальнікі і актывісты руху «ЗУБР». Мітынг прайшоў пад лёзунгамі «Не замінайце нам працаваць», «Не аддамо заробак за кватэру» і інш.

МАГІЛЕЎ — не працавала прыкладна 40% прадпрымальнікаў. А 15.00 адбыўся «канцэрт пустых рандляў», затым мясцовай адміністрацыі перадалі петыцыю ад прадпрымальнікаў;

ГОРАДНЯ — страйкаваў буйнейшы рынак «Паўднёвы»;

ЛІДА — страйкавала 80%, часткова працавалі прадаўцы харчоў;

СЛОНІМ — страйкавала 90% прадпрымальнікаў, выйшлі на працу
толькі прадаўцы харчоў, якія хутка псуюцца.

БЕРАСЬЦЕ — два буйнейшыя рынкі гораду “Рэчавы” і “Юбілейны” не працавалі цалкам. На “Рэчавым” рынку прадпрымальнікі раніцай правялі сход і разыйшліся па дамох;

ЖЛОБІН — страйкавала 100% прадпрымальнікаў. Прайшоў мітынг, прынятая рэзалюцыя з патрабаваньнем адстаўкі мясцовых уладаў.

РАГАЧОЎ — страйкавала 100% індывідуальных прадпрымальнікаў, у тым ліку прыватныя цырульні, швачныя атэлье, таксісты. Адбыўся мітынг з удзелам каля 100 чалавек, прынятая рэзалюцыя з патрабаваньнем адмены Дэкрэтаў №3 і №4 і адстаўкі шэрагу службовых асобаў. На мітынгу прысутнічалі прадстаўнікі выканкаму, падаткавай службы, фонду сацыяльнай абароны.

Прадстаўнікі мясцовай адміністрацыі хутка пакінулі мітынг -- іх абразіла наступнае выказваньне ў рэзалюцыі мітынгу: “Дзеяньні ўраду, органаў кантролю і сілавых структураў нагадваюць дзеяньні войскаў СС, якія прымянялі тактыку "выпаленай зямлі" адносна мірнага насельніцтва. Іх прынцып "галоўнае ўрваць сёньня, а заўтра — трава не расьці"».

МАР`ІНА ГОРКА — страйкавала 100% прадпрымальнікаў;

РЭЧЫЦА — з прадпрымальнікаў, якія гандлююць харчамі, страйкавала прыкладна 50%, з астатніх прадпрымальнікаў — каля 70%.