Аляксей Марачкін: Вызваліце плошчы ад бальшавіцкіх ідалаў :: Хартыя'97 :: Навiны

Вядомы мастак і грамадзкі дзеяч Аляксей Марачкін лічыць за неабходнае “вызваліць” плошчы беларускіх гарадоў ад “бальшавіцкіх ідалаў”. Выступаючы 16 сакавіка на Ўсебеларускім сходзе інтэлігенцыі ў Менску, Марачкін прапанаваў упрыгожыць гарадзкія плошчы манумэнтамі дзеячоў нацыянальна-вызвольнага руху, беларускай дзяржаўнасьці, навукі й культуры, перадае БелаПАН.

У Менску да гэтага часу не ўсталаяваныя даўно адлітыя мэмарыяльныя дошкі, прысьвечаныя стваральнікам Інстытута беларускай культуры й абвяшчэньню 25 сакавіка 1918 году незалежнасьці Беларускай Народнай Рэспублікі. Аляксей Марачкін прапануе замест помнікаў Уладзімеру Ўльянаву (Леніну) і Міхаілу Калініну, якія зараз усталяваныя ў цэнтры Менску, узьвесьці помнікі князям Вялікага княства Літоўскага Міндоўгу і Вітаўту, а таксама Кастусю Каліноўскаму й Францішку Скарыне.

Адносна ўзаемаадносінаў дзяржавы й мастакоў, Марачкін адзначыў: “У цывілізаваным грамадзтве дзяржава паважае й шануе майстраў пэндзлю і разца, якія ўтвараюць залаты запас нацыі. У нашай краіне мастакі ня могуць атрымаць майстэрню і больш за 20 гадоў чакаюць адкрыцьця прыбудовы да Нацыянальнага мастацкага музэю, дзе плянуецца адкрыць сталую экспазыцыю беларускага выяўленчага мастацтва”.