«Саюзных» крэдытаў больш ня будзе :: Хартыя'97 :: Навiны

Пратэрмінованая запазычанасьць суб’ектаў гаспадараньня па пагашэньні крэдытаў, выдадзеных зь бюджэту “саюзнай дзяржавы” Беларусі й Расеі, складае больш за 300 млн. расейскіх рублёў. Пра гэта паведаміў журналістам у аўторак у Менску намесьнік дзяржсакратара “саюзу” Ігар Селіванаў.

“Дадзеныя абставіны шмат у чым паўплывалі на тое, што з пачатку сёлетняга году выдача бюджэтных крэдытаў прыпыненая”, - адзначыў ён.

Асноўнымі неплатнікамі па выдадзеных раней крэдытах выступаюць прадпрыемствы Беларусі й Расеі, якія задзейнічаныя ў рэалізацыі саюзных праграмаў “разьвіцьцё дызельнага аўтамабілебудаваньня” і “Саюзны тэлевізар”.

“На дадзены час, -- сказаў І.Селіванаў, -- намеціўся пэўны прагрэс у пагашэньні крэдытаў і, магчыма, часткова гэтая запазычанасьць можа быць унесеная на рэструктурызацыю. У якасьці “скрайняга выпадку” Сталы камітэт пакідае за сабой права на зварот па спагнаньні з даўжніка ягонай маёмасьці”.