Мерапрыемствы па сьвяткаваньні 85-ых угодак абвяшчэньня БНР :: Хартыя'97 :: Навiны

Сьвяточныя мерапрыемствы з нагоды 85-ых угодак абвяшчэньня Беларускай Народнай Рэспублікі пройдуць ня толькі ў Менску, але і ў іншых гарадох Беларусі. Пра гэта паведамілі на прэс-канфэрэнцыі 19 сакавіка прадстаўнікі кааліцыйнай працоўнай групы па сьвяткаваньні гадавіны БНР – старшыня Партыі БНФ Вінцук Вячорка, намесьнік старшыні незарэгістраванай Аб’яднанай сацыял-дэмакратычнай партыі Аляксей Кароль, старшыня Рэспубліканскай грамадзкай арганізацыі “Таварыства беларускай мовы імя Францішка Скарыны” (ТБМ) Алег Трусаў.

Паводле арганізатараў, сьвяточныя мерапрыемствы, падрыхтаваныя працоўнай групаю, пачнуцца 19 сакавіка ў памяшканьні Ўправы БНФ, дзе пройдзе публічная лекцыя “Беларуская Народная Рэспубліка”. Тут 21 сакавіка а 18.00 адкрыецца выстава мастацкай суполкі “Пагоня”.

Урачысты мітынг, шэсьце і ўскладаньне кветак да помнікаў вялікім беларусам павінна адбыцца ў Менску 25 сакавіка. Плянуецца, што шэсьце пачнецца а 17.30 на плошчы Якуба Коласа і пройдзе да парку Янкі Купалы. Адпаведная заяўка пададзеная ў Менгарвыканкам.

Завершыць праграму сьвяткаваньня канцэрт, які пачнецца ў сталічным Доме ветэранаў 25 сакавіка а 19.30. Чакаецца, што ў канцэрце прымуць удзел гурты “Стары Ольса”, “Старалітва”, “Кудзьмень”, “Artes Liberalis”, барды Алесь Камоцкі і Зьміцер Сідаровіч.

Паводле старшыні ТБМ Алега Трусава, мерапрыемствы, падрыхтаваныя гэтай арганізацыяй, пройдуць і ў некаторых гарадох Беларусі -- Баранавічах (Берасьцейская вобласьць), Віцебску, Горадні, Лідзе (Гарадзенская вобласьць).

Як ужо паведамляў БелаПАН, сваю праграму сьвяткаваньня ўгодак абвяшчэньня БНР падрыхтаваў і Нацыянальны камітэт пад старшынствам гісторыка Анатоля Грыцкевіча. Аднак, паводле прадстаўнікоў кааліцыйнай працоўнай групы, “ніхто нікому ня будзе забараняць” удзельнічаць у тых ці іншых мерапрыемствах, заплянаваных на бліжэйшыя дні.