Мінжылкамгас парушае асноўны эканамічны закон краіны :: Хартыя'97 :: Навiны

У гэтым яго абвінаваціла дэпутацкая група “Рэспубліка”, якая накіравала ва ўрад паведамленьне, у якім патрабуе “”перагледзіць жыльлёва-камунальную палітыку”. Дакумэнт быў прыняты па выніках арганізаванага 18 сакавіка групай “Рэспубліка” ў “парлямэнце” “круглага стала” па праблемах “сацыяльнай абароны насельніцтва ва ўмовах рэзкага павышэньня тарыфаў на паслугі ЖКХ”. Удзел у ім прынялі прадстаўнікі Мінжылкамгасу, Міністэрства працы й сацыяльнай абароны, канцэрну “Белэнэрга”.

На гэта намесьнік міністра жыльлёва-камунальнай гаспадаркі Мікалай Ліпень адказаў, што яго ведамства не ўсталёўвае тарыфы. Гэта, паводле чыноўніка, прэрагатыва абласных выканаўчых камітэтаў і Міністэрства эканомікі. Праблему М.Ліпень бачыць не ў росьце тарыфаў, а ў занадта маленькай заробнай плаце насельніцтва, а гэта, паводле яго, ужо кампэтэнцыя Міністэрства працы й сацыяльнай абароны. У адказ “дэпутат” Уладзімер Навасяд прапанаваў скараціць Мінжылкамгас, бо ён “ні за што не адказвае”. “Дэпутаты” засталіся незадаволеныя вынікамі абмеркаваньня і вырашылі накіраваць зварот да Генадзя Навіцкага. “Парлямэнтары” просяць кіраўніка ўраду перагледзіць нарматывы выдаткаваньня энэргіі насельніцтвам і распрацоўваць схему ільготнага крэдытаваньня для ўсталяваньня лічыльнікаў гарачай і халоднай вады, а таксама ацяпленьня.