Арыштаваныя 23 сакавіка апазыцыянэры сталі Вязьнямі сумленьня :: Хартыя'97 :: Навiны

Пра гэта заявіла праваабарончая арганізацыя “Міжнародная амністыя” ў распаўсюджанай сёньня заяве. У дакумэнце, у прыватнасьці, паведамляецца: “Прайшло менш за два тыдні з моманту арышту былога намесьніка міністра замежных справаў Андрэя Саньнікава, праваабаронцы Людмілы Гразновай, каардынатара Хартыі’97 Зьмітра Бандарэнкі й прадпрымальніка Леаніда Малахава, якія былі асуджаныя да пятнаццаці сутак за арганізацыю масавай акцыі 12 сакавіка ў Менску. "Міжнародная амністыя" будзе разглядаць кожнага арыштаванага ў сувязі з удзелам у акцыі 23 сакавіка, а таксама дэманстрацыі 12 сакавіка, як Вязьня сумленьня". Праваабарончая арганізацыя таксама заклікае ўлады неадкладна і без усялякіх умоваў вызваліць вязьняў.

2003 год становіцца чарговым нешчасьлівым годам для мірнага самавыказваньня ў Беларусі. І без таго адмоўны сьпіс парушэньняў правоў чалавека ў краіне папоўніўся чарговай хваляю рэпрэсіяў, гаворыцца ў заяве “Міжнароднай амністыі”.

23 сакавіка як мінімум 50 мірных дэманстрантаў былі затрыманыя ў цэнтры Менску ў час несанкцыянаванай дэманстрацыі супраць палітыкі ўраду Аляксандра Лукашэнкі, таксама прымеркаванай да 85 гадавіны з моманту абвяшчэньня БНР. “Гэты абуральны інцыдэнт зьяўляецца чарговым сыгналем таго, што ўрад Аляксандра Лукашэнкі груба парушае правы чалавека і асноўныя свабоды грамадзянаў Беларусі”, -- заявіла “Міжнародная амністыя”.

“Палітыка Аляксандра Лукашэнкі, якога ня раз крытыкавалі за арышты сваіх суграмадзянаў, вартая асуджэньня”, -- піша “Міжнародная амністыя”.