Згуртаваньне беларусаў Канады павіншавала суайчыньнікаў з гадавінай БНР :: Хартыя'97 :: Навiны

Згуртаваньне беларусаў Канады павіншавала суайчыньнікаў з гадавінай БНР. “25 сакавіка 1918 году ўпершыню ў амаль тысячагадовай гісторыі нашага самабытнага народа была абвешчаная дзяржаўнасьць Беларусі і ўтвораная Беларуская Народная Рэспубліка. У гэты сьвяточны дзень просім Вас згадаць свае карані, сваіх родных і блізкіх, краіну, якая Вас узрасьціла, і ўсьвядоміць сваю прыналежнасьць да цудоўнага краю, які даў сьвету Ф.Скарыну і К.Каліноўскага, І.Дамейку і М.Агінскага, А.Міцкевіча і Т.Касьцюшку, Ф.Дастаеўскага і М.Шагала, Я.Купалу й Я.Коласа, М.Багдановіча і Л.Геніюш, Р.Барадуліна і В.Быкава і яшчэ шмат іншых годных людзей. Пачуцьцё нацыянальнага гонару, паважлівае стаўленьне да культуры й гісторыі людзей, адзінства і братэрства нам зараз патрэбныя, каб захаваць само існаваньне беларусаў як нацыі на Зямлі”, -- гаворыцца ў звароце, падпісаным галоўнай управаю ЗБК.

Як паведамляе БелаПАН, Згуртаваньне беларусаў Канады было заснаванае ў 1948 годзе ў Таронта. Прадстаўніцтвы згуртаваньня існуюць у Манрэалі, Садбуры, Гамільтане, Вініпегу, Атаве, канадзкім Лёндане і іншых гарадох. Паводле Міжнароднай грамадзкай арганізацыі “Згуртаваньне беларусаў сьвету “Бацькаўшчына”, беларуская дыяспара ў сьвеце налічвае каля 3,5 мільёнаў чалавек, а ў Канадзе жыве 70.000 беларусаў.