Беларусь не ратыфікавала пагадненьне аб “саюзнай” уласнасьці :: Хартыя'97 :: Навiны

Будаўніцтву “саюзнае дзяржавы” перашкаджае да гэтага часу нератыфікаванае Беларусьсю пагадненьне аб саюзнай уласнасьці, якое было падпісанае бакамі ў 2002 годзе. Пра гэта ў інтэрвію РІА “Новости” заявіў намесьнік дзяржаўнага сакратара “саюзнае дзяржавы” Сяргей Калашнікаў. Паводле яго, сёньня “тыя залогавыя інструмэнты, якія мы выкарыстоўваем для крэдыту ў адсутнасьці закону аб уласнасьці, ня могуць быць пераведзеныя ва ўласнасьць з тае прычыны, што наяўнай ўласнасьці няма”.

Яшчэ адной праблемай зьяўляецца тое, што на сёньня сыстэма выдачы новых крэдытаў на рэалізацыю “саюзных” праграмаў стала больш складанай.

У гэтай сувязі, паведаміў Калашнікаў, “прынятае рашэньне аб крэдытаваньні некаторых праграмаў па прынцыпу крэдытаваньня стаўкі займу банкаўскага крэдыту”.

Аднак, зазнаўчыў намесьнік дзяржсакратара, “адна справа аддаць крэдыт у якасьці фінансаваньня “саюзнай” праграмы з забавязкам вяртаньня. Іншая справа – прафінансаваць стаўку крэдыту, калі банкі ніякіх крэдытаў бяз пэўных забавязкаў не даюць”.

Кажучы пра бюджэт “саюзнае дзяржавы”, Калашнікаў назваў яго прыняцьце ў студзені “незвычайным посьпехам”. На сёньня бюджэт пачынае рэалізоўвацца, ідзе фінансаваньне тых праграмаў, якія ў ім закладзеныя.

“Што тычыцца вяртаньня раней выдадзеных крэдытаў, то тут справа ідзе па-рознаму”, -- паведаміў Калашнікаў.

З аднаго боку, цэлы шэраг структураў, якім у канцы 90-х гадоў выдавалі крэдыт пад разьвіцьцё сумесных праграмаў, вяртаюць грошы.

У той самы час, паводле Калашнікава, цэлы шэраг прадпрыемстваў, не адмаўляючыся ад вяртаньня грошай, прапанавалі перагледзіць саму сыстэму вяртаньня, каб выкарыстоўваць гэтыя сродкі для дальнейшага разьвіццья “саюзных” праграмаў.

У агуле, сьцьвярджае намесьнік дзяржсакратара, “ідзе паўнавартаснае вяртаньне грошай па крэдытах”.