Вінцук Вячорка – 10 сутак арышту :: Хартыя'97 :: Навiны

Старшыня Партыі БНФ “Адраджэньне” Вінцук Вячорка асуджаны судом Савецкага раёну Менску да 10 сутак арышту. Прысуд вынес судзьдзя Руслан Казадаеў. Палітыка прызналі віноўным у парушэньні арт.167 ч.2 КоАП – арганізацыя несанкцыянаваных мерапрыемстваў. Той факт, што лідэр БНФ атрымаў 10 сутак арышту замест 15-ці, якімі звычайна караюць арганізатараў акцыяў, паводле словаў судзьдзі, тлумачыцца тым, што Вінцук Вячорка сам заклікаў удзельнікаў учорашняй акцыі разыходзіцца. У той самы час актывістка ЗУБРа Тацяна Елавая была асуджаная судом Савецкага раёну Менску да 5 сутак арышту. Дзяўчына была арыштаваная ўчора на акцыі, прымеркаванай да гадавіны ўтварэньня БНР. І правяла ноч перад судом у спэцпрыёмніку-разьмеркавальніку на вуліцы Акрэсьціна. Тацяну Елавую прызналі віноўнай у парушэньні арт.167 ч.1 КоАП – удзел у несанкцыянаваных мерапрыемствах. Прысуд адносна яе вынесла Наталя Скугарова. Суды над затрыманымі ўчора апазыцыянэрамі працягваюцца ў Савецкім судзе Менску.