Шапікі зьнікнуць зь менскіх вуліц праз тры месяцы :: Хартыя'97 :: Навiны

Перасоўваньне аб’ектаў дробнай розьніцы Менску (шапікаў, латкоў) у адмыслова вызначаныя месцы плянуецца завяршыць да 1 ліпеня 2003 году, паведаміў начальнік кіраваньня прадпрымальніцтва Менскага гарадзкога выканаўчага камітэту Аляксандар Каліноўскі на прэсавай канфэрэнцыі 26 сакавіка.

Паводле яго, у адпаведнасьці з канцэпцыяй разьвіцьця дробнарозьнічнага гандлю сталіцы прадпрымальнікам прапануюць некалькі варыянтаў разьмяшчэньня сваіх гандлёвых кропак, перадае БелаПАН. У прыватнасьці, шапікі й латкі могуць перасунуць у стацыянарныя аб’екты гандлю, буйныя гандлёвыя цэнтры й паркінгі, а таксама ў кватэры на першых паверхах дамоў у мікрараёнах сталіцы, якія будуць пераводзіцца ў нежылы фонд. Каліноўскі падкрэсьліў, што падыход да кожнага прадпрымальніка будзе індывідуальным, “жорсткага, агульнага рашэньня праблемы ня будзе”.
Паводле яго, нядаўна ў Менгарвыканкаме будзе створаная адмысловая працоўная група па перасоўваньні аб’ектаў дробнай розьніцы, якую ачоліў намесьнік старшыні Менгарвыканкаму Мікалай Ярохаў. Начальнік кіраваньня таксама паведаміў, што на сёньня ў Менску функцыянуе больш за 3 тысячы аб’ектаў дробнай розьніцы, на якіх працуюць каля 8 тысячаў чалавек. Паводле яго, штомесяц у бюджэт гораду ў выглядзе адзінага падатку на прыбытак ад іх паступае каля 600 тысячаў эўра.