Украіна высунула ўмовы беларускім вытворцам запалак :: Хартыя'97 :: Навiны

Міністэрства эканомікі Ўкраіны накіравала беларускаму ўраду праект забавязкаў, пры выкананьні якіх беларускія вытворцы запалак могуць пазьбегнуць антыдэмпінгавых санкцыяў адносна паставак на ўкраінскі рынак.

Як паведамілі "Интерфаксу" ва ўрадзе, украінскі бок, у прыватнасьці, прапануе стварыць у Беларусі структуру ліцэнзаваньня паставак запалак, якая гарантуе экспарт у тым аб’ёме, які ня будзе наносіць шкоду мясцовым вытворцам аналягічнай прадукцыі.

Акрамя таго, беларускім экспартэрам прапануецца ўзяць на сябе забавязкі па кошту продажу, адпаведныя інтарэсам украінскіх прадпрыемстваў.

На дадзены час вытворцамі запалак зьяўляюцца некалькі беларускіх дрэваапрацоўчых прадпрыемстваў, у тым ліку “Пінскдрэў”, “Барысаўдрэў”, “Гомельдрэў”.

Паводле дадзеных беларускага ўраду, у бліжэйшы час з украінскім бокам плянуецца правесьці кансультацыі па пытаньнях прыняцьця беларускімі вытворцамі адзначаных забавязкаў.

Як паведамілі ва ўрадзе, украінскі бок 6 сьнежня леташнега году пачаў расьсьледаваньне ўмоваў паставак беларускіх запалак на ўкраінскі рынак зь ініцыятывы мясцовых вытворцаў адносна тавара беларускага й расейскага паходжаньня, кіруючыся законам “Аб абароне нацыянальнага таваравытворцы ад дэмпінгавага імпарту”.