У Беларусь прыяжджае міністар замежных справаў Кубы :: Хартыя'97 :: Навiны

Згодна плянам беларуска-кубінскага супрацоўніцтва міністар замежных справаў Рэспублікі Куба Фэліпэ Пэрэс Роке наведае з афіцыйным візытам Рэспубліку Беларусь з 28 па 31 сакавіка 2003 году, паведаміў на брыфінгу прэс-сакратар МЗС Беларусі Андрэй Савіных.

У час візыту адбудуцца перамовы Філіпэ Пэрэса Рокэ зь міністрам замежных справаў Беларусі Сяргеем Мартынавым. На іх будуць абмяркоўвацца стан й пэрспэктывы двухбаковага супрацоўніцтва. Мяркуецца, што адбудуцца сустрэчы кіраўніка кубінскага замежнапалітычнага ведамства з Аляксандрам Лукашэнкам і прэм’ер-міністрам Беларусі Генадзем Навіцкім, кіраўнікамі абедзьвюх палатаў “нацыянальнага сходу” і “парлямэнцкай” групай па супрацоўніцтву Беларусі з Кубай.

Праграмай візыту прадугледжаная сустрэча з кіраўніцтвам Берасьцейскай вобласьці й наведваньне мэмарыяльнага комплексу “Брэсцкая крэпасць-герой” і Белавескай пушчы.

Паводле інфармацыі МЗС, дадзены візыт зьяўляецца чарговым этапам на шляху разьвіцьця ўсебаковага супрацоўніцтва паміж Беларусьсю й Кубай. Гэта першы за апошнія 8 гадоў візыт кіраўніка кубінскага замежнапалітычнага ведамства ў Беларусь.

Важнай падзеяй ў беларуска-кубінскіх адносінах стаў візыт Лукашэнкі ў Рэспубліку Куба ў верасьні 2002 году. Падпісаная ў часе гэтага візыту Дамова аб сяброўскіх зносінах і супрацоўніцтве надала двухбаковым зносінам якасна новы характар. Абедзьве краіны актыўна супрацоўнічаюць у рамках міжнародных арганізацыяў, маюць блізкія пазыцыі па актуальных праблемах сучаснасьці, паведаміў прэс-сакратар МЗС.

Рэспубліка Куба цягам апошніх гадоў з`яўляецца адным з асноўных гандлёвых партнэраў Беларусі ў Лацінскай Амэрыцы. Аб’ём двухбаковага гандлю за 2002 год склаў 32 мільёны даляраў ЗША. Аднак яго патэнцыял пакуль не выкарыстоўваецца ў поўнай меры. Намэнклятура беларускіх тавараў, якія пастаўляюца на Кубу (трактары й запчасткі да іх, аўтамабілі, шыны, аптычныя вырабы, электраабсталяваньне), сьведчыць пра рэальныя магчымасьці павелічэньня беларускага эскспарту ў гэтую краіну.