На сэсіі ПА РЭ пра Беларусь будуць размаўляць у кулуарах :: Хартыя'97 :: Навiны

На вясновай сэсіі ПА РЭ, якая адбудзецца з 1 па 5 красавіка, пытаньні па Беларусі не ўвойдуць у павестку дня. Але, тым не менш, кулуарная праца абяцае быць вельмі насычанай. У інтэрвію прэс-службе АГП намесьнік старшыні Аб’яднанай грамадзянскай партыі Яраслаў Раманчук падзяліўся сваімі плянамі перад паездкай у Брусэль:

--Я зьбіраюся праінфармаваць дэпутатаў Парлямэнцкай асамблеі Рады Эўропы, розныя палітычныя групы, фракцыі аб выніках правядзеньня мясцовых выбараў у Рэспубліцы Беларусь. Будуць абмяркоўвацца і такія тэмы, як сытуацыя з правамі чалавека, СМІ й стан законнасьці. Распавяду пра тое, наколькі рашэньне ПА АБСЭ аб прызнаньні “палаты прадстаўнікоў” паўплывала на паводзіны ўлады й наколькі эфэктоўна дадзеная структура пачынае працаваць.

Паколькі ПА РЭ, у адрозьненьні ад ПА АБСЭ, мае дакладныя крытэрыі сяброўства і проста так не надае статус назіральніка, нават і адмыслова запрошанага, то і выканаўчай уладзе дадзенай структуры, і заканадаўчай – самой ПА РЭ – важна ведаць, наколькі Беларусь прасоўваецца наперад да выкананьня вельмі канкрэтных патрабаваньняў. Размова ідзе ў першую чаргу пра праект закону аб сродках масавай інфармацыі, якія яшчэ ня вынесены на абмеркаваньне ні ў “палату прадстаўнікоў”, ні, тым больш, палітычных партыяў і структураў грамадзянскай супольнасьці. Пытаньне аб увядзеньні пасады омбудсмэна таксама знаходізцца ў нявызначаным стане. Законапраекту па ім ніхто ня бачыў. Самае галоўнае пытаньне – пашырэньне паўнамоцтваў “парлямэнту” і зьмены заканадаўства па выбарах, патрабаваньне, без якога правядзеньне любой кампаніі па выбарах у Рэспубліцы Беларусь пазбаўленае ўсялякага сэнсу. І ў гэтым кірунку мы таксама ня бачым пакуль ніякага прагрэсу.

Таму ўсе найбольш важныя падзеі, якія дабыліся ў Беларусі з моманту студзенскай сэсіі ПА РЭ, будуць мной выкладзеныя ў пісьмовым выглядзе і вусна будуць абмяркоўвацца з палітычнай камісіяй, з тактычнымі й юрыдычнымі камітэтамі ПА РЭ, з прадстаўнікамі працоўнае групы па Беларусі, а таксама з кіраўніцтвам Парлямэнцкай асамблеі.