У Беларусі самае таннае ўсынаўленьне :: Хартыя'97 :: Навiны

Самае дарагое ўсынаўленьне – у Расеі: амаль 9500 эўра. Самае таннае – у Беларусі: 1900 эўра. Гэтыя дадзеныя прыведзеныя ў дакумэнце, складзеным па распараджэньні міністра ўраду Італіі Стэфаніі Прэстаджакама для Камісіі па ўсынаўленьні дзяцей за мяжой.

Такім чынам, бацькі, якія жадаюць усынавіць дзеяцей, будуць мець у сваім распараджэньні дадзеныя, якія дазволяць ім ня стаць ахвярамі шматлікіх махінацыяў.

Як піша сёньня "La Stampa", італьянскія фірмы, якія парушаюць тарыфы, будуць пазьбаўляцца ліцэнзіяў для працы за мяжой. Прадугледжаныя тры ўзроўні расцэнак для працэдуры ўсынаўленьня дзяцей на тэрыторыі Італіі з улікам утрыманьня пакетаў паслуг: ад 1360 эўра (асноўныя паслугі) да 3596 эўра (паслугі, якія прадугледжваюць аказаньне дапамогі сям’і, што ўсынавіла дзіцёнка).

У дакумэнце згадваецца, што сума выдаткаў на ўсынаўленьне залежыць ад краіны. Самае дарагое ўсынаўленьне -- у Расеі: максымальная сума складае 9453 эўра. Калі ўсынаўленьне адбываецца ў Маскве, то бацькі адначасна выплочваюць 7800 эўра, у Санкт-Пецярбургу – 6900. Самыя нізкія расцэнкі ў Беларусі – 1900 эўра. “Пры такіх расцэнках, -- кажа міністар Прэстыджакама, -- мы можам плянаваць увядзеньне дадатковых ільготаў для менш забясьпечаных сям’яў, якія на дадзены час маюць цяжкасьці ў сувязі з высокімі расходамі, зьвязанымі з усынаўленьнем дзяцей у некаторых краінах”.

Гэты дакумэнт дазволіць дапамагчы іншым сіратам, больш дарослым, школьнага ўзросту, “якія вымушаныя доўгі час знаходзіцца ў адмысловых установах”. Сем’і змогуць усынаўляць падлеткаў. На думку псыхолягяў і экспэртаў, больш дарослыя дзеці хутчэй адаптуюцца да новых умоваў і хутчэй прывязваюцца да новых бацькоў. Старшыня камісіі падкрэсьлівае, што “гэты дакумэнт павінен дапамагчы, у першую чаргу менш забясьпечаным сем’ям і гарантаваць ім максымальную дапамогу”.

У дакумэнце ўтрымліваюцца чатыры табліцы (па кантынэнтах), у якіх прыводзяцца дадзеныя па выдатках у розных краінах. Пасьля Расеі самыя вялікія выдаткі адзначаюцца ў Гандурасе, Калюмбіі, Гватэмале, у той час як самыя прыстойныя ўмовы для ўсынаўленьня – у Беларусі, Марока, Тайландзе і Румыніі.