Улады працягваюць парушаць правы грамадзянаў Беларусі на мірныя сходы :: Хартыя'97 :: Навiны

12, 23, 25 сакавіка 2003 году ў Беларусі адбыліся масавыя затрыманьні ўдзельнікаў мірных дэманстрацыяў, якія не стваралі пагрозы грамадзкаму парадку. Пасьля гэтых акцыяў было асуджана 38 асобаў. Зь іх былі зьняволеныя 24 асобы, 6 атрымалі штрафы, 8 – папярэджаньні.

Асаблівую закляпочанасьць выклікае тое, што па выніках судоў не быў апраўданы ніводзін з затрыманых удзельнікаў акцый. Судзьдзі выносілі неабгрунтавана жорсткія абвінаваўчыя пастановы, нават ў тых выпадках, калі віна ўдзельнікаў акцыяў не была даказаная, а паказаньні сьведкаў былі непасьлядоўнымі і супярэчлівымі.

Назіраецца небясьпечная тэндэнцыя -- суды не выносяць апраўдальных пастановаў па адміністратыўнах справах удзельнікаў мірных акцыяў.

Судзьдзі пры вынясеньні пастановаў не праводзяць поўны і ўсебаковы разгляд такіх справаў, абмяжоўваюцца стандартнымі паказаньнямі сьведкаў – супрацоўнікаў міліцыі, якія зьяўляюцца зацікаўленымі асобамі і часта займаюцца ілжэсьведчаньнямі. Гэта сьведчыць пра тое, што суды зьяўляюцца залежнымі і неаб’ектыўнымі.

Мы зьвяртаем увагу, што ў адпаведнасьці з Канстытуцыяй Рэспублікі Беларусь, суды павінны быць незалежнымі. Пры вынясеньні рашэньня па справе судзьдзя павінен кіравацца толькі тымі фактамі, якія зьяўляюцца даказанымі. Згодна з рашэньнем Пленума Вярхоўнага суда Рэспублікі Беларусь ад 25 сакавіка 1999 году, суды пры разглядзе справаў павінны кіравацца прынцыпам прэзумпцыі невінаватасьці.
Мы патрабуем спыніць перасьлед, у тым ліку -- судовы, удзельнікаў мірных акцыяў.