Словы й факты :: Хартыя'97 :: Навiны

Жыльлёвае будаўніцтва павінна стаць у бліжэйшыя гады аб’ектам прыярытэтнага фінансаваньня й пільнай увагі дзяржавы.
(З тэзаў праграмы кандыдата ў прэзыдэнты Рэспублікі Беларусь А.Лукашэнкі, 1994 г.)

Для грамадзянаў, якія маюць права на бясплатнае жыльлё, забясьпечыць будаўніцтва жылых дамоў за кошт бюджэтных сродкаў і задаволіць патрэбы гэтых грамадзянаў у жыльлі не пазьней за 1999 год (стаяць на ўліку па стану на 01.10. 96 г). Паводле прагнозавых разьлікаў, да 2000 году штогадовае ўвядзеньне ў дзеяньне жылых дамоў пераўзыдзе ўзровень 1990 году, што створыць рэальныя ўмовы для зьняццья вастрыні жыльлёвай праблемы ў рэспубліцы.
(З асноўных накірункаў сацыяльна-эканамічнага разьвіцьця Рэспублікі Беларусь на 1996--2000 гады.)

...І факты

У 1990 годзе ў Беларусі было ўведзена ў дзеяньне 5.282 тысячаў квадратных мэтраў агульнай плошчы жыльля, у 2002 годзе -- 2.825 тысячаў квадратных мэтраў, ці амаль у два разы меней.

Вось такое становішча з выкананьнем абяцаньня “пераўзысьці ўзровень 1990 году" па ўвядзеньні ў дзеяньне жылых дамоў.

Паводле дадзеных той самай дзяржаўнай статыстыкі, на пачатак 2001 году на ўліку стаяла 568,8 тысячаў сямей і адзінокіх грамадзянаў краіны, якія маюць патрэбу ў паляпшэньні жыльлёвых умоваў. Амаль столькі сама, колькі і 10 гадоў таму.

Вось так выканана абяцаньне па “зьняцьці вастрыні жыльлёвай праблемы”.