«Палатка» абараняе Садама :: Хартыя'97 :: Навiны

“Палата прадстаўнікоў” прыняла 2 красавіка на першым плянарным паседжаньні вясновай сэсіі заяву ў сувязі з вайной ЗША супраць Іраку. У гэтым дакумэнце “дэпутаты” выказалі глубокі занепакой адносна вайны, разьвязанай ЗША й Вялікабрытаніяй супраць Рэспублікі Ірак. “Ваенныя дзеяньні супраць сувэрэннага Іраку разгорнутыя ў аднабаковым парадку, без рашэньня Рады Бясьпекі ААН і таму павінны разглядацца як акт агрэсіі”, - падкрэсьліваецца ў заяве. “Дэпутаты” адзначаюць, што ўварваньне ўзброеных сілаў ЗША й Вялікабрытаніі на тэрыторыю Іраку не было выкліканае аб’ектыўнай неабходнасьцю, бо гэтая краіна не была небясьпечнай для ЗША, іх хаўрусьнікаў і іншых дзяржаваў. Відавочна, што ЗША ініцыявалі вайну супраць Іраку ня толькі з-за доступу да багатых радовішчаў нафты ў гэтым рэгіёне. Але і для таго, каб замацваць сваё панаваньне над сьветам, гаворыцца ў заяве.

“Парлямэнтары” асуджаюць агрэсію супраць Іраку і лічаць, што ў рашэньні вострых праблемаў сучаснага сьвету ваенныя апэрацыі не павінны служыць аргумэнтам чыёйсьці слушнасьці і спосабам вырашэньня канфлікту. “Палата прадстаўнікоў” патрабуе спыніць бамбардзіроўкі Іраку й заклікае ЗША і іх хаўрусьнікаў праявіць здаровы сэнс і вывесьці свае войскі з тэрыторыі гэтай краіны.

Беларускія “парлямэнтары” таксама зьвяртаюцца да ААН, парлямэнтароў усіх дзяржаваў і міжпарлямэнцкіх арганізацыяў з заклікам прыняць усе меры для спыненьня вайны ў Іраку. Нельга дапусьціць далейшую эскалацыю канфлікту, наступствы якога могуць стаць стратэгічнымі ня толькі для ірацкага народу, але і для ўсёй сусьветнай супольнасьці, адзначаецца ў заяве “палаты прадстаўнікоў”.

На сэсіі “палаты прадстаўнікоў” пры разглядзе гэтага пытаньня прысутнічаў надзвычайны й паўнамоцны амбасадар Рэспублікі Ірак у Беларусі Салман Зэйдан.