«Палатка» закрывае вочы на недэмакратычнасьць мясцовых выбараў :: Хартыя'97 :: Навiны

2 красавіка “палата прадстаўнікоў” адмовілася ўключыць у павестку дня шостай сэсіі парлямэнцкія слуханьні аб выніках выбараў дэпутатаў мясцовых Саветаў і аб праблемах прымяненьня выбарчага заканадаўства. З такой ініцыятываю да “дэпутацкага” корпусу зьвярнуўся Валеры Фралоў. Паводле яго, падставаю для ўнясеньня гэтага пытаньня сталі яго асабістыя назіраньні за мясцовымі выбарамі.

Валеры Фралоў і яшчэ два “дэпутаты” -- Уладзімер Навасяд і Ўладзімер Парфяновіч – прымалі ўдзел ў выбарах у якасьці назіральнікаў кандыдата ў Менгарсавет Аляксандра Мельнікава. Паводле Фралова, у час назіраньня імі выяўленыя “пэўныя парушэньні” выбарчага заканадаўства. Дэпутат паведаміў, што, у сувязі з гэтым, ён нават унёс у парлямэнт праект зьменаў у Выбарчы кодэкс.

Аднак, як заявіў старшыня сталай камісіі па дзяржаўным будаўніцтве, мясцоваму самакіраваньню і рэглямэнту Міхаіл Сасанко, “не нашая кампэтэнцыя – займацца тым, што адбывалася месяц ці паўтара таму; для гэтага ёсьць суды й пракуратура”.

Падобнае меркаваньне выказаў і “дэпутат” Валеры Хрол. Ён таксама заявіў, што разгляд такіх пытаньняў не ўваходзіць у кампэтэнцыю “палаты прадстаўнікоў”.

У выніку прапанову Валерыя Фралова падтрымалі ўсяго 15 парлямэнтараў; 61 выказаўся супраць; астатнія ўстрымаліся.