Двух апазыцыянэраў спынілі перасьледаваць па суду :: Хартыя'97 :: Навiны

Суд Барысаўскага раёну й гораду Барысава спыніў адміністратыўную вытворчасьць адносна старшыні мясцовай арганізацыі партыі БНФ Анатоля Аскеркі і актывіста свабоднага прафсаюзу прадпрымальнікаў Мікалая Віторскага. Такое рашэньне суд прыняў 2 красавіка.

Аскерка і Віторскі абвінавачваліся ў парушэньні артыкула 167 Кодэксу аб адміністратыўна-прававых парушэньнях – за ўдзел і выступы на несанкцыянаваным мітынгу, які прайшоў у Барысаве 12 сакавіка ў рамках акцыі “Народны марш”, перадае БелаПАН. Сьведкам з боку міліцыі ў судзе выступіў намесьнік начальніка аддзелу ГАУС па грамадзкай бясьпецы Ігар Белы. Паводле яго, супрацоўнікі міліцыі ня сталі затрымліваць удзельнікаў акцыі ў той самы дзень, бо баяліся варожай рэакцыі з боку мітынгоўцаў. Пратаколы на дзеяньні падсудных былі складзеныя міліцыяй 19 сакавіка, прычым меркавалася, што менавіта Аскерка і Віторскі былі арганізатарамі несанкцыянаванага мітынгу. Аднак суд прыняў на ўвагу наступныя абставіны. Па-першае, міліцыя не даказала факт арганізацыі публічнага мерапрыемства Анатолем Аскеркам і Мікалаем Віторскім, якія заявілі, што ня ведалі аб несанкцыянаваным характары акцыі. Па-другое, у час сваіх выступаў на мітынгу абвінавачаныя не карысталіся гукаўзмацняльнай тэхнікай, не трымалі ў рукох плякатаў і атрыбутыкі такога кшталту. Гэта пацьвердзіла сьведка – карэспандэнт газэты “Кур’ер” Алена Аўтушка. У выніку судзьдзя Леанід Пухавы заявіў, што суд ня бачыць прызнакаў правапарушэньня ў дзеяньнях Анатоля Аскеркі й Мікалая Віторскага і спыняе адміністратыўную вытворчасьць.